Sport

Ardhja e lojtares nga Bundesliga motivon Kosovën para ndeshjeve të vështira

Futbollistet e Përfaqësueses së Kosovës të martën kanë filluar grumbullimin për ndeshjet e ardhshme kualifikuese të Kampionatit Botëror të vitit 2023.

Në stërvitjen e “Dardaneve” të mbajtur në Hajvali, ishte e pranishme edhe mesfushorja Gentiana Fetaj. 19-vjeçarja javën e shkuar zgjodhi të luajë për Kosovën, përkundër që ka luajtur për gjeneratat U15, U16, U17 dhe U19 të Gjermanisë. Ajo është pjesë e skuadrës nga Bundesliga, Carl Zeiss Jena, kurse më herët ka luajtur edhe për Bochumin, Gueterslohin e Arminia Bielefeldin. Megjithatë, Fetaj nuk do t’i ndihmojë Kosovës në ndeshjet kundër Polonisë dhe Shqipërisë, pasi ka ardhur vetëm për t’u adaptuar me ekipin.

Në fakt, ajo ende nuk e ka rregulluar dokumentacionin, por kjo nuk e ka penguar mesfushoren që të jetë nën urdhrat e përzgjedhëses Afërdita Fazlija. Fetaj ka thënë se ishte shumë e rëndësishme për të që të jetë pjesë e ekipit në këtë grumbullim për t’u njohur me futbollistet e tjera. Ajo pritet të debutojë me Kosovën në vitin e ardhshëm.

“Fillimisht më duhet të pres deri në rregullimin e dokumentacionit, pasi nuk ka përfunduar ende. Më duhet të pres dhe vitin tjetër shpresoj të luaj. Për mua është e rëndësishme të jem këtu dhe të takohem me vajzat. Kam pasur dëshirë të njoh nga afër vajzat dhe të stërvitemi së bashku. I kam përcjellë ndeshjet e Kosovës dhe jam e informuar mirë për gjithçka”, insistoi Fetaj. “Kam dashur të vijë dhe të luajë për Kosovën, duke e ndihmuar”.

Futbollistja e talentuar, që po pret debutimin me fanellën e Kosovës, e ka zbuluar edhe arsyen kryesore se pse vendosi të jetë pjesë e “Dardaneve”. Fetaj ka thënë se është nga Kosova dhe se vendimit më së shumti i është gëzuar babai i saj.

“Kam luajtur për Gjermaninë, por tani kam vendosur të luajë për Kosovën, pasi është vendi im e mbi të gjitha e kam edhe familjen nga Kosova. Babai im ka qenë shumë i gëzuar për këtë vendim. Edhe unë jam e gëzuar dhe e nderuar që do ta barti fanellën e Kosovës”, ka insistuar Fetaj.

Përzgjedhësja e Kosovës, Afërdita Fazlija, e ka cilësuar si vlerë të shtuar për “Dardanet” ardhjen e mesfushores Fetaj. Fazlija ka pranuar se i vjen shumë keq që Fetaj nuk do të mund të debutojë me Kosovën këtë muaj.

“Realisht, Gentiana është një prurje e re, është një vlerë për Përfaqësuesen e femrave të Kosovës. Fatkeqësisht nuk do ta kemi të gatshme për këto dy ndeshje. Arsyeja është dokumentacioni. Ajo ka luajtur ndeshje në Gjermani për mosha të reja dhe kjo është një procedurë që bëhet në këto raste. Megjithatë, unë shpresoj që Gentiana do të sjellë efekt edhe nga fakti që është bashkuar në këtë grumbullim. Mirëpo, në të llogarisim në vazhdim për kualifikimet të cilat ndeshje i kemi në prill të vitit të ardhshëm”, u shpreh Fazlija.

Kosova ndeshjen e ardhshme e luan të enjten kundër Polonisë. Kjo është hera e parë që përfaqësuesja kosovare përballet me Poloninë në kuadër të këtyre kualifikimeve. Pesë ditë pas këtij dueli, Kosova në Prishtinë, do të përballet edhe me Shqipërinë. Në ndeshjen e parë ndaj Shqipërisë, Kosova pati luajtur 1:1.

Te Kosova janë të fokusuar te dueli me Poloninë, në të cilin Fazlija shpreson në një rezultat pozitiv. Polonia është e dyta në grup me tetë pikë, katër më shumë se Kosova.

“Definitivisht për një kundërshtare siç është Polonia nuk kemi kohë të mjaftueshme të përgatitemi për këtë ndeshje. Vajzat, të cilat i kemi ftuar për këto dy ndeshje, janë futbolliste të cilat janë aktive dhe kanë pasur ndeshje në kampionatet nga vijnë. Ne futemi për rezultat maksimal. Jemi të vetëdijshëm që Polonia ka një cilësi dhe një ngritje këto dy dekadat e fundit. Megjithatë, ne jemi përgatitur për këtë ndeshje dhe futemi për rezultat pozitiv. Synimi është të japim maksimumin dhe t’iu mundësojmë vajzave të shfaqin krejt atë çfarë dinë”, shtoi përzgjedhësja Fazlija.

Edhe kapitenia e Kosovës, Edona Kryeziu, e ka cilësuar si shumë të vështirë ndeshjen kundër Polonisë. “Ndeshja me Poloninë e dimë se do të jetë tejet e vështirë, pasi ka një skuadër shumë të mirë, të fuqishme. Por, ne asnjëherë nuk do të dorëzohemi pa hyrë në lojë. Do ta japim maksimumin dhe shpresojmë të dalim me rezultat pozitiv”, theksoi Kryeziu.