Tetova: Jam i kënaqur me lojën pavarësisht humbjes

Seria e tri fitoreve të njëpasnjëshme e Ulpianës u ndal të shtunën në Lipjan. Ulpiana u mposht në shtëpi nga Gjilani, por pavarësisht disfatës, i lumtur me paraqitjen është shprehur trajneri i lipjanasve, Edlir Tetova.

“Jam shumë i kënaqur me paraqitjen e djemve, si në pjesën e parë ashtu edhe në të dytën. Në pjesën e dytë patëm raste ta dyfishonim rezultatin por ky është futbolli. Nëse nuk shënon, pëson. Falë kualitetit të Prognit ndodhi edhe ajo që ndodhi, rezultati shkoi në të mirë të Gjilanit”, theksoi Tetova.

Gjilani fitoi me shumë vështirësi në udhëtim te Ulpiana sipas trajnerit të gjilanasve, Ismet Munishi. Megjithatë, pikët e plota kanë rëndësi më së shumti në këtë pikë të sezonit.

“Forma e futbollistëve u përmirësua në pjesën e dytë. Ishte përsëritje e ndeshjes që u zhvillua në Gjilan. Ulpiana e ka tranzicionin e lojës shumë të rrezikshëm. Ne e mbuluam sulmuesin kryesor të tyre, një lojtar i mençur. Ulpiana ka edhe lojtarë shumë të shpejtë në krah. Pas rezultatit 1:0, ka mundur ta dyfishojë rezultatin pasi i kishte rastet e veta, por fati i përcjellë trimat. Me meritë arritëm ta fitojmë këtë ndeshje”, ka deklaruar Munishi pas ndeshjes.

© KOHA. Të gjitha të drejtat janë të rezervuara.