Liqeni mposhtet thellë, nuk kalon në raundin elitar

Kampioni i Kosovës në futsall, Liqeni i Drenasit, e ka luajtur të premten mbrëma ndeshjen e dytë në raundin kryesor të Ligës së Kampionëve. Liqeni humbi 7:1 nga kampioni i Ukrainës, Uragan.

Ndeshja është luajtur në Ivano-Frankivsk të Ukrainës, ku po zhvillohet turneu i Grupit 6 të raundit kryesor (Main Round) të Championsit.

Vetëm fituesi i grupit avancon tutje në raundin elitar, ndërsa Liqeni tashmë është pa gjasa. Uragani ka fituar dy ndeshjet e deritashme. Edhe nëse e humb ndeshjen e tretë do të jetë i pari. Në rast se skuadrat kanë pikë të barabarta, atëherë shikohet bilanci i ndërsjellë. Uragani udhëheq me 6 pikë, ndërsa Arazi azerbajxhanas dhe Liqeni i kanë nga 3 pikë. Ndaj dy skuadrave kanë fituar ukrainasit.

Liqeni të enjten fitoi 6:4 ndaj United Galatit të Rumanisë. Ndërkohë Uragani fitoi 2:1 ndaj Arazit. Të premten Arazi fitoi 5:3 ndaj Galatit.

Të dielën janë ndeshjet Liqeni – Araz dhe Uragan – Galati.

Në humbjen e thellë të së premtes, golin e vetëm për Liqenin e shënoi Nagles Sanches në minutën e 36-të.

Liqeni ka kaluar me sukses raundin parakualifikues të Ligës së Kampionëve.

Kampioni i Kosovës në futsall, Liqeni, po pëson thellë në ndeshjen e dytë të raundit kryesor të Ligës së Kampionëve. Liqeni po humb 4:0 pas pjesës së parë të ndeshjes me kampionin ukrainas, Uragan.

Ndeshja po luhet në Ivano-Frankivsk të Ukrainës.

Vendasit pas vetëm 25 sekondave kaluan në epërsi. Në minutën e katërt ukrainasit shënuan edhe golin e dytë, ndërsa në minutën e 20-të, përkatësisht të fundit të pjesës së parë, Liqeni pësoi edhe dy gola.

Liqeni të enjten fitoi 6:4 ndaj United Galatit të Rumanisë.

Ndërkohë Uragani e mposhti 2:1 Arazin azerbajxhanas.

Të dielën Liqeni luan me Arazin, por me humbja nga Uragani, gjasat do t’i ketë minimale për të avancuar në raundin elitar. Vetëm fituesi i grupit avancon.

© KOHA. Të gjitha të drejtat janë të rezervuara.