Edicioni 2021/22 i Ligës Unike në basketboll nis të shtunën, pas Superkupës Mbarëkombëtare që përfundoi vikendin e shkuar, e në të cilën triumfoi kampioni në fuqi i Kosovës, Golden Eagle Ylli.
Në fakt, Ylli është fitues në fuqi i Ligës Unike, pasi në muajin prill triumfoi në turneun e mbajtur në Durrës.
Edicioni i parë i Ligës Unike ishte zhvilluar në formë turneu, me çerekfinale, gjysmëfinale dhe finale. Dhe të shtunën, më në fund, nis edicioni i rregullt i Ligës Unike, ku paraqiten skuadra të basketbollit nga Kosova e Shqipëria.
Në turneun e mbajtur në pranverë, një prej skuadrave nga Shqipëria, Teuta e Durrësit, ishte tërhequr me arsyetimin se koha ishte e shkurtër që të bëhej gati për pjesëmarrje.
Të shtunën zhvillohen dy ndeshje dhe të dielën dy të tjera, në kuadër të xhiros së parë. Tri prej ndeshjeve luhen në Shqipëri, ndërsa një në Kosovë.
Krahas Yllit, basketbollin kosovar këtë edicion në Ligën Unike do ta përfaqësojnë edhe Peja, Rahoveci e Prizreni-16. Ndërsa Teuta, Vllaznia, Kamza dhe Tirana janë ekipet pjesëmarrëse nga Shqipëria.
“Besoj se do të jetë interesant, pasi paraqiten katër skuadrat më të mira të sezonit të kaluar të Kosovës dhe Shqipërisë. Për ne është shumë e rëndësishme pasi luajmë për herë të parë dhe besoj se do të kemi paraqitje të mira. Sigurisht, synimi është që ta fitojmë Ligën Unike sikurse edhe garat e tjera në të cilat marrim pjesë këtë sezon, pas triumfit në Superkupën e Kosovës”, ka thënë trajneri i Prizeni-16, Arbnor Rifati.
Tirana – Rahoveci dhe Prizreni-16 – Kamza janë ndeshjet e së shtunës, që nisin prej orës 17:00. Të dielën në të njëjtin termin luhet dueli mes Teutës dhe Pejës, ndërsa prej orës 19:00 në Shkodër takohen Vllaznia e Ylli.
Krerët e Ligës Unike janë të bindur se ky edicion do të jetë shumë interesant dhe me rivalitet të madh. Edicioni 2021/22 do të zhvillohet me pjesën e rregullt – me vajtje e ardhje – përpara se të nisin garat e plejofit.
“Më në fund po ia nisim sezonit të ri në Ligën Unike. Do të jetë një sezon shumë interesant dhe me rivalitet të madh pasi klubet janë të mobilizuara në çdo aspekt dhe të gatshme ta japin më të mirën. Ekipet kosovare kanë pak përparësi ndaj atyre të Shqipërisë pasi kanë nisur më herët me gara”, ka thënë drejtori i Ligës Unike, Dren Zatriqi.
“Superkupa Mbarëkombëtare dëshmoi se gjithçka është gati dhe prej të dyja anëve do të ketë cilësi e rivalitet. Por, për fat të keq, ka kufizime të tifozëve si në Kosovë ashtu edhe në Shqipëri, gjë që shpresoj të ndryshohet me kalimin e kohës”.
B o x *******
T: Liga Unike – 1
E shtunë
Tirana – Rahoveci (17:00)
Prizreni-16 – Kamza (17:00)
E diel
Teuta – Peja (17:00)
Vllaznia – Ylli (19:00)
© KOHA. Të gjitha të drejtat janë të rezervuara.
