1 perditesime
19:56

Historike, Kosova me fitore 13:0 në gara evropiane

Kosova të premten ka shënuar fitoren më të thellë prej se FFK-ja është bërë pjesë e UEFA-s e FIFA-s (2016). Është përfaqësuesja U17 e futbollisteve që ka fituar shumë thellë ndaj Gjeorgjisë në Luksemburg. Ndeshja e fazës kualifikuese për Evropianin e vitit të ardhshëm ka përfunduar 13:0 për Kosovën.

As për së afërmi ekipet përfaqësuese dhe skuadrat kosovare të futbollit nuk kanë shënuar fitore kaq të thellë deri më tani.

Kosova U17 është pjesë e grupit 1 të Ligës B të kualifikimeve për Euro 2022.

Më 27 shtator takohet me Bjellorusinë, ndërsa më 30 shtator me Luksemburgun.

Me sukses mund të kalojë në Ligën A për fazën e dytë kualifikuese, që ia hapë mundësinë për kualifikim në Evropian.

Dallimi në cilësi mes vajzave të Kosovës dhe atyre të Gjeorgjisë ishte shumë i madh.

Këtë e dëshmon rezultati i ndeshjes. Rinesa Alija, Rreze Gashi dhe Aurora Racaj kanë shënuar nga tre gola. Eriola Delija shënoi dy gola, ndërsa Bardha Gjonbalaj e Antigone Shabani shtuan nga një gol.

18:52

Kosova U17 po udhëheq 4:0 pas pjesës së parë

Futbollistet e Kosovës U17 kanë dominuar në pjesën e parë të ndeshjes ndaj Gjeorgjisë. Pas 45 minutave lojë, rezultati është 4:0 në të mirë të futbollisteve të reja të Kosovës.

Ndeshja po luhet në Luksemburg dhe i takon grupit të parë të Ligës B të raundit kualifikues për Evropian.

Eriola Delija ka shënuar në minutën e 19-të dhe në minutën e 35-të. Bardha Gjonbalaj shënoi në minutën e 21-të, ndërsa fare në fund të pjesës së parë realizoi edhe Rinesa Alija.