Pas shkëlqimit te Zuerichu, Kryeziu synon debutimin te Kosova
Mirlind Kryeziu e ka nisur edicionin e ri me ekipin e Zuerichut në Superligën e Zvicrës në mënyrën më të mirë të mundshme.
Premium
Mirlind Kryeziu e ka nisur edicionin e ri me ekipin e Zuerichut në Superligën e Zvicrës në mënyrën më të mirë të mundshme.
Qendërmbrojtësi ka qenë titullar i padiskutueshëm në tri duelet e para të këtij edicioni, ndërsa ka realizuar edhe një gol. Shtatlarti pjesë e skuadrës së parë të klubit zviceran është për gati gjashtë vjet.
Ka zhvilluar 62 ndeshje deri me tani, kurse ka realizuar tre gola dhe ka bërë edhe dy asistime.
Kryeziu thotë për KOHËN se është shumë i kënaqur me paraqitjet që ka pasur deri më tani në fillim të edicionit të ri. Ai tregon se meritat për formën e mirë i ka edhe trajneri i ri i skuadrës zvicerane.
“Përgatitjet kanë shkuar shumë mirë para kampionatit. Edhe trajneri që është ndërruar më ka dhënë shumë vetëbesim. Kemi zhvilluar edhe disa miqësore dhe kam kaluar shumë mirë. Jam shumë i kënaqur edhe me startin që kemi në Superligën e Zvicrës. Kemi tri fitore në po aq ndeshje. Kam shënuar edhe një gol. Për momentin e kam fituar vendin e titullarit, por duhet të vazhdojë kështu nga ndeshja në ndeshje. Duhet të vazhdoj me paraqitje të mira dhe t’i tregoj trajnerit që nuk ka gabuar që më ka besuar dhe më ka bërë titullar”, tha Kryeziu të enjten.
Ai thekson se edhe huazimi te Kriensi, në gjashtë muajt e parë të këtij viti, e ka ndihmuar shumë.
“Huazimi te Kriensi më ka ndihmuar. Ka qenë një moment që e kam parë edhe unë që duhet të ndodhë një ndryshim. Për këtë kam biseduar me trajnerin, me Zuerichun dhe me prindërit e mi. Është dashur të ndodhë një ndryshim, pasi kam gati gjashtë vjet që jam pjesë e ekipit të parë të Zuerichut dhe kam besuar që një ndryshim do të më ndihmojë. Dhe ashtu doli”, u shpreh Kryeziu.
24-vjeçari është bashkëlojtar me Fidan Alitin, që është pjesë e Përfaqësueses së Kosovës. Ndërkohë Hekuran Kryeziu dhe Benjamin Kololli më nuk janë pjesë e skuadrës zvicerane. Mirlind Kryeziu thotë se po i mungojnë ata.
“Me Fidanin po kalojmë shumë mirë. Të dy luajmë në mbrojtje. Po flasim shqip dhe ndonjëherë edhe gjermanisht. Po i ndihmojmë njëri-tjetrit si në lojë e po ashtu edhe në stërvitje”, deklaroi mbrojtësi i qendrës.
Shtatlarti kosovar, që ka luajtur për grupmoshat e reja të Zvicrës, është pjesë e Kosovës që nga nëntori i vitit 2018. Ka qenë disa herë i grumbulluar, por ende nuk ka debutuar me “Dardanët”. Së fundi nuk ishte grumbulluar.
“Kam qenë i grumbulluar në shumë ndeshje, por nuk e kam luajtur asnjë takim. Normal, kur të vjen ftesa unë jam gjithmonë i gatshëm ta pranoj dhe të vij për të luajtur. Kur të shkojmë atje, jemi 20 lojtarë që kërkojnë vendin e titullarit për të luajtur për Kosovën. Unë kurrë nuk e kam stresuar veten për këtë. Kam pasur dëshira çdoherë ta tregoj veten, kam pasur dëshirë të jap 100 për qind. Por në fund vendos trajneri se kush luan për t’i ndihmuar ekipit. Atë gjë ia lë trajnerit në dorë. Puna ime është të luaj futboll dhe t’i tregoj trajnerit që jam i gatshëm për të ofruar më të mirën”, shtoi Kryeziu.
Ai e pranon se pas paraqitjeve të mira pret që të ftohet nga Kosova për ndeshjet e shtatorit. Megjithatë, insiston se i takon trajnerit të vendosë.
“Për momentin jam në formë shumë të mirë. Tri ndeshjet e para në kampionat besoj që i kam luajtur mirë, kështu që nëse trajneri i Kosovës mendon se mund të ndihmoj në mbrojtje unë jam i gatshëm. Do të isha i gëzuar të kem një ftesë dhe të shkoj e të tregoj që jam në top-formë. Në fund të fundit, është trajneri ai që vendos se cilin lojtar do ta ftojë. Unë jam i gatshëm çdoherë. Po pres se çfarë do të vendosë trajneri Bernard Challandes”, deklaroi Kryeziu. Ai natyrisht e synon edhe debutimin.
“Kam pritur të luaj. Futbollin e kam profesion dhe normal që kam dëshirë të luaj. Në fund përsëri vendos trajneri, ai e vendos njëmbëdhjetëshin. Kur kam qenë unë në ekip, rezultatet kanë qenë shumë të mira dhe është vështirë t’i përzihesh trajnerit. Unë jam gjithmonë i gatshëm për Kosovën dhe asnjëherë nuk shkoj me atë mendimin që po luaj mirë te Zuerichu dhe dua të luaj edhe te Kosova. Atë e vendos trajneri”.
Kryeziu zbulon se si i kishte thënë “po” Kosovës dhe jep një premtim të madh, pavarësisht se ende nuk ia ka dhënë rastin përzgjedhësi Challandes.
“Kam luajtur për Zvicrën që nga U15 e deri tek U21. E kam pasur një takim në Cyrih me Bernard Challandesin, ku më kanë ndihmuar edhe Hekuran Kryeziu dhe Benjamin Kololli që të vendosi dhe të vij të luaj për Kosovën. Nuk ka qenë vështirë t’i them po Kosovës. Unë nuk kam ardhur me mendimin se e kam pranuar Kosovën dhe duhet të luaj me çdo kusht. Kam ardhur me atë mendimin që dua të kontribuoj për Kosovën, dua ta ndihmoj Kosovën. Jam i gatshëm të jap 100 për qind nëse Bernard Challandes më jep mundësinë. Unë kam vendosur që të luaj për Kosovën dhe po më rrah zemra që të luaj për Kosovën. Edhe nëse nuk kam ftesë prej Kosovës nuk ka asnjë gjasë që unë ta ndërroj Kosovën me ndonjë shtet tjetër”, thekson Kryeziu.
Mirlind Kryeziu ka kontratë me Zuerichun deri në vitin 2022. Është lindur dhe rritur në Zvicër, ndërkohë prindërit e tij janë nga fshati Mleçan i Malishevës.
Zuerichu i ka fituar tri ndeshjet e para në Superligën zvicerane dhe ndan pozitën e parë me Baselin. Te Zuerichu janë edhe Lindrit Kamberi, Bledian Krasniqi e Blerim Xhemaili.
