Organizatori i turneut të boksit në Gjakovë tregon për incidentin

Organizatori i turneut të djeshëm të boksit në Gjakovë ka treguar për incidentin që ndodhi.

Halil Kurhasku, menaxher i klubit organizator “Sport Center”, ka thënë se nuk ka pasur sulm ndaj referëve, por vetëm ofendime nga njëri prej tifozëve, i cili ka qenë i pakënaqur me vendimin e referëve për një meç.

Kurhasku për KOHËN ka treguar se Policia e ka shoqëruar tifozin jashtë palestrës, dhe aty ka ndodhur një incident mes tifozit e Policisë.

“Nuk ishte sulm ndaj gjyqtarëve, vetëm pati ofendime nga njëri prej tifozëve, i cili ka filluar të afrohet te delegati. Policia e ka ndal pastaj dhe gjatë largimit të tij nga Policia jashtë palestrës ka ndodh një incident mes tij dhe zyrtarëve policorë. Jashtë palestrës siç edhe kam dëgjuar janë bashkuar edhe disa familjarë të tifozit, kur e kanë parë se Policia po e arreston. Pastaj kam dëgjuar se janë arrestuar tre persona. Referimi ka qenë në nivel, por prapëseprapë, do të ketë çdoherë pakënaqësi”, ka thënë Halil Kurhasku.

KOHA mëson se te incidenti erdhi pas kumtimit të rezultatit në meçin e kategorisë deri 75 kilogramë mes Jozef Rasit të Gjakovës dhe boksierit të KB Trepçës së Mitrovicës, Imer Manxholli.

Turneu i boksit është organizuar më 19 qershor nga klubi i boksit “Sport Center”, Gjakovë, për nder të 22 vjetorit të Çlirimit të Gjakovës.

Policia e Kosovës ka bërë të ditur se janë arrestuar tre të dyshuarit meshkuj kosovar në Gjakovë pasi që të njëjtit duke shprehur pakënaqësitë e tyre rreth vendimit të gjyqtarëve gjatë një turniri të boksit, i kanë sulmuar fizikisht referat dhe zyrtarët policor derisa ishin në kryerje të detyrës zyrtare.

Me vendim të prokurorit të dyshuarit pas intervistimit janë liruar në procedurë të rregullt.

© KOHA. Të gjitha të drejtat janë të rezervuara.