4 perditesime
22:55

Realit i mjafton barazimi pa gola, City e fiton edhe ndeshjen e dytë ndaj Dortmundit

Real Madridi ka avancuar në gjysmëfinale të Ligës së Kampionëve, falë fitores që e arriti në ndeshjen e parë 3:1 përballë Liverpoolit.

Në duelin e kthimit të çerekfinales të Ligës së Kampionëve, të luajtur të mërkurën mbrëma në stadiumin “Anfield Road”, Liverpooli dhe Real Madridi kanë luajtur pa gola.

Pas kualifikimit në gjysmëfinale, Real Madridi do të përballet me skuadrën e Chelseat për një vend në finale.

Manchester City e ka fituar edhe ndeshjen e dytë çerekfinale të Ligës së Kampionëve përballë Borussia Dortmundit me rezultatin identik për t’u kualifikuar në gjysmëfinale të kësaj gare.

Skuadra angleze ka triumfuar edhe në ndeshjen e kthimit me shifrat 2:1 për t’u futur në mesin e katër skuadrave më të mira të Evropës.

Riyad Mahrez (55’) nga penalltia dhe Phil Foden (75’) kanë shënuar golat për Cityn që ishte në disavantazh prej minutës së 15-të kur golin e epërsisë për Dortmundin e shënoi Jude Bellingham. Në gjysmëfinale, Manchester City do të përballet me Paris Saint-Germainin.

22:42

Manchester City shënon golin e dytë, i afrohet gjysmëfinales

Manchester City e ka shënuar edhe golin e dytë kundër Dortmundit si mysafir.

Ekipi anglez po udhëheqë 2:1 dhe është shumë afër kualifikimit në gjysmëfinale.

Golin e dytë për City e shënoi anglezi Phil Foden në minutën e 75-të.

22:15

City barazon rezultatin kundër Dortmundit

Manchester City e ka barazuar rezultatin në 1:1 në ndeshjen kundër Dortmundit. Riyad Mahrezi ka shënuar nga penalltia në minutën e 54-t për skuadrën angleze.

Penalltia u akordua pasi Emre Can luajti me dorë brenda zonës.

21:49

Pa gola në “Anfield”, Dortmundi në epërsi kundër Manchester Cityt

Sonte po zhvillohen dy ndeshjet e kthimit të çerekfinales së Ligës së Kampionëve.

Në “Anfield”, Liverpooli dhe Real Madridi e kanë mbyllur pjesën e parë 0:0.

Ndeshjen e parë të luajtur në Madrid, e kishte fituar Reali 3:1.

Ndërkaq, në përballjen tjetër, Dortmundi është duke fituar në pjesën e parë me rezultat 1:0 kundër Manchester Cityt.

Jude Bellingham ka shënuar golin për skuadrën gjermane në minutën e 15-të. Ndeshjen e parë në Angli e ka fituar Man City me rezultat 2:1.

21:20

Dortmundi në epërsi ndaj Manchester Cityt

Dortmundi ka kaluar në epërsi ndaj Manchester Cityt, në ndeshjen e kthimit në çerekfinale të Ligës së Kampionëve.

Jude Bellingham ka shënuar golin për skuadrën gjermane në minutën e 15-të.

Ndeshjen e parë të luajtur në Angli, e ka fituar Manchester City 2:1.