Te Peja e shohin fazën finale të turneut të Ligës Unike në basketboll si mundësi për përgatitje në prag të plejofit të Superligës së Kosovës. Por pejanët pranojnë se synim e kanë kualifikimin në finale të turneut nismëtar të kësaj lige të përbashkët.
Se Peja kërkon finalen ka thënë trajneri, Dragan Radoviq, të hënën për KOHËN. Skuadra e Pejës është kualifikuar në gjysmëfinale të turneut të Ligës Unike dhe do të përballet me Rahovecin, ndeshje kjo që zhvillohet të martën prej orës 16:00 në Durrës.
Në rast të triumfit, Peja do të kualifikohet në finale të turneut të parë të Ligës Unike, që filloi javën e shkuar në formatin “Final 8”. Tri ndeshje çerekfinale u zhvilluan në Rahovec, kurse gjysmëfinalet e finalja do të luhen në Durrës. Teuta e Durrësit hoqi dorë nga turneu dhe Rahoveci kaloi direkt në gjysmëfinale.
Peja do të jetë e fokusuar edhe në plejofin e kampionatit të Kosovës që do të nisë në vikend.
Peja do të luajë në çerekfinale kundër Prishtinës derisa Rahoveci, që ka përfunduar i dyti në pjesën e rregullt, është kualifikuar direkt në gjysmëfinale.
Trajneri i Pejës, Radoviq ka pranuar se fazën finale të Ligës Unike do ta përdorë për ta përgatitur ekipin sa më mirë për plejof, duke zbuluar se synimi i ekipit të tij është titulli i kampionit. Malazezi Radoviq ka shtuar se ka dëshirë të luajë edhe në finale të Ligës Unike dhe ta fitojë atë, për ta shkruar historinë me Pejën. Ai ka pranuar se termini i ndeshjeve të Ligës Unike është e papërshtatshme, por ka besim në ekipin që drejton.
“Na pret një sfidë e madhe në Ligën Unike që ndoshta nuk është në një kohë ideale sa i përket përgatitjeve për plejof, por do ta shfrytëzojmë si të tillë. Do të mundohemi të japim maksimumin, në mënyrë që me disponim ta presim fillimin e garave në plejof dhe luftën për titullin e kampionit”, është shprehur Radoviq, i cili ka folur për përballjen me Rahovecin. “Mendoj qe kemi cilësi në ekip dhe forma është e mirë, kështu që pres një paraqitje të mirë dhe kalimin në finale të Ligës Unike. Rahoveci ka një ekip fantastik dhe duhet t’i qasemi fuqishëm prej fillimit, në mënyrë që të vjen në shprehje cilësia jonë dhe kualifikimi në finalen e Ligës Unike që do të ishte i rëndësishëm për ne. Jemi përgatitur por do të përgatitemi edhe për garat e plejofit”.
Peja në çerekfinale të Ligës Unike e ka mposhtur Vllazninë e Shkodrës. Për Rahovecin dueli ndaj Pejës do të jetë i pari në kuadër të kësaj lige të përbashkët. Basketbollisti i Rahovecit, Altin Morina ka thënë se synim i ekipit të tij është të startojë me fitore në këtë ligë. Rahoveci në këtë takim futet pas fitores ndaj Yllit në ndeshjen e fundit kampionale derisa Peja e mposhti Vëllaznimin.
“Pres një rivalitet të madh në ndeshjen gjysmëfinale përballë Pejës, megjithatë ne do ta kërkojmë fitoren për t’u kualifikuar në finale. Fakti që jemi kualifikuar direkt në gjysmëfinale të plejofit në Superligë na e lehtëson punën pasi do të kemi kohë edhe për pushim edhe për t’u përgatitur sa më mirë”, është shprehur Morina.
Në gjysmëfinalen tjetër, që nis prej orës 19:00, do të takohen Goga Basket dhe Ylli. Ylli në çerekfinale ka triumfuar ndaj Sigal Prishtinës derisa Goga Basket ishte më e mirë se Tirana.
Finalja e Ligës Unike do të zhvillohet të mërkurën prej orës 19:00, derisa prej orës 16:00 do të luhet ndeshja për vendin e tretë.
E martë – gjysmëfinalet
Rahoveci – Peja (16:00)
Goga Basket – G.E. Ylli (19:00)
© KOHA. Të gjitha të drejtat janë të rezervuara.
