Sport

Gara për Kupë me “finale” të hershme

Të hënën në ambientet e stadiumit “Fadil Vokrri” në Prishtinë është hedhur shorti për 1/8 e finales të Kupës së Kosovës në futboll. Dueli kryesor i kësaj faze do të zhvillohet në të njëjtën arenë, atë ‘Fadil Vokrri”.

Do të përballen fituesja në fuqi e Kupës së Kosovës, Prishtina, dhe kampionia në fuqi, Drita. Këto skuadra në fillim të shkurtit do ta luajnë edhe ndeshjen e Superkupës së Kosovës, e cila pritet të zhvillohet në Turqi.

Futbollisti i Prishtinës, Besnik Krasniqi, ka thënë për KOHËN se përballja me Dritën është “finale e hershme”. Ai premton se do të përgatiten maksimalisht për duelin ndaj ekipit nga Gjilani për të arritur fitore, e cila do t’ia siguronte kalimin tutje.

Kupa vlerësohet me shumë peshë për skuadrat kosovare. Është rruga e shkurtër drejt garave evropiane.

“Do të jetë një ndeshje shumë e fortë. Mendoj se do jetë një përparësi për ne, pasi do të luajmë si vendas, por prapëseprapë gabimet e vogla do vendosin ndeshjen. Ne do hyjmë dhe do ta japim më të mirën në mënyrë që të kalojmë tutje. Kjo ndeshje mendoj që është një finale e hershme pasi përballen dy superekipe”, ka deklaruar Krasniqi.

Ai foli edhe për ndeshjen e Superkupës, e cila do të luhet para ndeshjes së Kupës. Sipas Krasniqit, Prishtina çdoherë lufton për të gjithë trofetë.

“Sa i përket Superkupës, me sa e di, do të luhet në Turqi. Ne jemi duke punuar çdo ditë në mënyrë që sa më shumë të përgatitemi për këto ndeshje dhe për kampionatin që na pret. Shpresoj që të vazhdojmë kështu dhe të mos kemi lëndime. Kemi besim që mund t’i arrijmë të gjitha, pasi dihet që Prishtina lufton çdoherë për të gjithë trofetë”, theksoi mbrojtësi i krahut të djathtë.

Short të vështirë e ka cilësuar edhe sulmuesi i rrezikshëm i Dritës, Kastriot Rexha. Ai ka thënë se edhe pse luajnë si mysafir do të bëjnë të pamundurën që të kalojnë tutje pasi, sipas tij, edhe Kupa është prioritet i Dritës.

Ndeshjet e kësaj faze luhen më 10 shkurt, ka njoftuar FFK-ja.

“Sigurisht short i vështirë, pasi Prishtina është ekip i mirë me lojtarë cilësorë dhe normalë se do të jetë vështirë. Por ne besojmë tek ekipi ynë pasi kemi një grup të mirë të lojtarëve. Krahas mbrojtjes së titullit, prioriteti ynë është edhe Kupa. Fondi i mjaftueshëm i lojtarëve dhe cilësia e tyre e madhe na lejon të luftojmë në të dyja frontet dhe besojmë që do t’ia dalim. Ne me Prishtinën do të luajmë edhe në Superkupë dhe besoj që do të jenë dy ndeshje mjaft interesante”, tha Rexha.

Ai shtoi se Drita ka qenë e pafat në vitet e fundit, duke luajtur si mysafire ndaj ekipeve të mëdha në kuadër të Kupës. Edhe Rexha mendon që dueli me Prishtinën është finale e para finales.

“Duke marrë parasysh cilësitë e skuadrave, forcën që kanë brenda vetes dhe synimet, atëherë mendoj që kjo është finale para finales. Ndoshta është herët që të luajnë mes vete këto ekipe, por që shorti ka dashur kështu. Ne do të luajmë sërish si mysafir dhe në vitet e fundit Drita nuk ka pasur fat në këtë drejtim, është përballur me ekipe të forta si mysafir, megjithatë shpresoj që t’ia dalim”, u shpreh Rexha.

Dy ndeshjet e këtij sezoni ndërmjet Prishtinës dhe Dritës kanë përfunduar me rezultat të barabartë, 0:0, në stadiumin e qytetit në Gjilan, dhe 1:1 në “Fadil Vokrri”, në Prishtinë.

Interesante pritet të jetë edhe ndeshja ndërmjet Llapit dhe finalistit të vitit të kaluar të Kupës, Ballkanit. Ndeshjet e tjera janë: A&N – Flamurtari, Trepça ’89 – Ferizaj, Drenica – Ulpiana, Dukagjini – 2 Korriku, Istogu – Gjilani, Arbëria – Feronikeli.