Liga Unike e basketbollit mes Kosovës dhe Shqipërisë nuk do të startojë këtë vit. Do të shtyhet për vitin e ardhshëm pas masave të vendosura nga Qeveria shqiptare. Në Shqipëri janë të ndaluara aktivitetet e sporteve me dorë, si dhe palestrat janë të mbyllura si masë për parandalimin e përhapjes së pandemisë COVID-19. Kjo ka shtyrë iniciatorët e themelimit të ligës së përbashkët mes Shqipërisë dhe Kosovës që ta shtyjnë për vitin tjetër. Megjithatë, kreu i Federatës Shqiptare të Basketbollit (FSHB), Avni Ponari, të martën për KOHËN ka thënë se ka një ide tjetër. Ai thotë se do të propozojë një aktivitet të përbashkët basketbolli, i cili do të jetë si një paralajmërim për fillimin e Ligës Unike që po pritet me padurim.
Ponari do të kërkojë mbajtjen e një turneu, në të cilin do të përfshihen skuadrat e Ligës Unike, që do të mund të mbahet në fund të këtij muaji. Saktësisht, më datën 28 nëntor për nder të ditës së pavarësisë së Shqipërisë dhe që do të quhet “Kupa e Pavarësisë”, kurse të gjitha ndeshjet të zhvillohen në Kosovë për shkak se aktivitetet sportive janë të lejuara dhe palestrat gjithashtu të hapura për gara.
“Duke parë që Liga Unike vështirë se mund të startojë këtë vit, atëherë do të propozojë që në kuadër të pavarësisë së Shqipërisë të zhvillohet një turne basketbolli dhe aktiviteti të mbahet në Kosovë. Besoj se është e realizuar dhe këtë ide do t’ia propozoj edhe Federatës së Basketbollit të Kosovës”, shtoi Ponari. “Pra, të bëjmë një aktivitet që të mos na shkojë huq ky vit pas marrëveshjes dhe paralajmërimeve për Ligën Unike. Besoj se me këtë aktivitet do të kompensohej fillimi i Ligës Unike deri në vitin e ardhshëm pasi në turne do të përfshiheshin të gjitha skuadrat pjesëmarrëse. Pra, këtë vit të mbahet ky turne dhe vitin tjetër të vazhdojmë me Ligën Unike”.
Në muajin shtator në Tiranë, u firmos marrëveshja mes dy federatave për Ligën Unike që ishte parashikuar të fillojë në fund të muajit tetor apo fillim të këtij muaji dhe u përgëzua nga të gjithë. I pranishëm në ceremoninë e nënshkrimit të marrëveshjes krahas personaliteteve të shumta sportive e politike, ishte edhe kreu i FIBA Evropës, Tugay Demirel, që përgëzoi të dyja federatat për këtë hap të ndërmarrë. Mirëpo, duke parë situatën aktuale në Shqipëri, një gjë e tillë duket e pamundur për këtë vit edhe pse klubet kosovare tashmë janë të gatshme duke pasur parasysh se kanë filluar garat në Superligën e Kosovës.
Kreu i FSHB-së, Ponari, ka insistuar se ekipet e Shqipërisë nuk janë të përgatitura për të luajtur këtë vit në Ligën Unike shkaku i moslejimit të aktiviteteve sportive me dorë dhe mbylljes së palestrave, gjë që ua pamundëson atyre të stërviten. Madje, ai ka thënë se kjo bllokadë do të ndikojë direkt edhe te Kombëtarja e Shqipërisë në basketboll, e cila në fund të këtij muaji duhet të luajë në kuadër të parakualifikimeve për Kampionatin Botëror të vitit 2023.
Edicioni i fundit i basketbollit si në Shqipëri ashtu edhe në Kosovë u ndërpre pas shpërthimit të koronavirusit në fillim të muajit mars.
“Në Shqipëri sportet me dorë dhe palestrat janë të mbyllura shkaku i situatës me koronavirus dhe nuk ka një dritë jeshile për lejimin e këtyre aktiviteteve. Situata sa vjen e rëndohet si pasojë e virusit dhe primar është shëndeti i njerëzve në këtë kohë. Në anën tjetër, sporti ka nevojë të zhvillohet, por është e pamundur aktualisht. Kështu që, jemi të papërgatitur”, ka pranuar Ponari. “Kështu që, Liga Unike mund të fillojë vitin tjetër pasi deri në fund të këtij viti duhet të merret një vendim përfundimtar dhe shpresoj që situata me virusin të përmirësohet”.
Edhe në Federatën e Basketbollit të Kosovës (FBK), kanë pranuar që garat në Ligën Unike mund të mos fillojnë deri në vitin tjetër dhe tashmë kanë përpiluar një plan me disa opsione dhe data. Në fakt, FBK-ja insiston se për fillimin e Ligës Unike gjithçka është gati, por gjërat kanë mbetur peng për shkak të bllokadës në Shqipëri. Madje, peng ka mbetur edhe tërheqja e shortit.
“Ne jemi në pritje që Liga Unike të fillojë në dhjetor, por duke pasur parasysh moslejimin e aktivitetit të basketbollit në Shqipëri, atëherë e kemi përgatitur një plan tjetër me disa opsione. Fillimisht po planifikojmë të nisim në muajin janar, e nëse nuk bëhet në janar, atëherë në muajin mars. I kemi disa opsione të përgatitura me ndeshjet që do të zhvillohen në Shqipëri dhe Kosovë për të përfunduar në muajin maj shkaku i pandemisë. Ne këtu në Kosovë jemi të gatshëm, zyra e Ligës Unike po funksionon dhe vazhdimisht po kontaktojmë me Bordin drejtues, por moslejimi i aktiviteteve në Shqipëri na ka bllokuar”, ka thënë sekretarja e përgjithshme e FBK-së, Elvira Dushku.
Si Kosova ashtu edhe Shqipëria, ka muaj që kanë caktuar skuadrat që do të marrin pjesë në Ligën Unike. Sigal Prishtina, Rahoveci, Golden Eagle Ylli dhe Peja janë ekipet kosovare, kurse Vllaznia, Teuta, Goga Basket dhe Tirana do ta përfaqësojnë Shqipërinë. Ndërsa, arbitrat tashmë e kanë mbajtur seminarin për të ndarë drejtësinë në Ligën Unike, që nuk do të nisë deri në vitin e ardhshëm.
© KOHA. Të gjitha të drejtat janë të rezervuara.
