Sport

Statuja e Vokrrit në përfundim e sipër

Statuja e futbollistit legjendar Fadil Vokrri është në përfundim e sipër dhe së shpejti do të vendoset në stadiumin e futbollit në Prishtinë që e mban emrin e tij.

Këtë e ka konfirmuar kryeministri i Kosovës, Avdullah Hoti, në një postim në Facebook.

“Statuja e Vokrrit në përfundim e sipër. Së shpejti e shohim në vend. Përgëzime artistëve që i dhanë formë dhe Ministres Dumoshi e bashkëpunëtorëve të saj për përkushtimin e treguar gjatë gjithë kohës”, ka shkruar Hoti në Facebook.

Ministrja e Kulturës, Rinisë dhe Sportit, Vlora Dumoshi, ka vizituar artistin llapjan Agron Blakçori, i cili është duke e skulpturuar statujën e Fadil Vokrrit.

Ministrja Dumoshi tha se sot ka qëndruar në Llap për një arsye të veçantë, e cila konfirmoi se statuja e Fadil Vokrrit është në përfundim.

“Më mrekulloi deri në emocion mjeshtëria dhe reflektimi i Fadilit, të cilin shpejt do ta kemi në bronz”, paralajmëroi ministrja.

Ministrja Dumoshi ka bërë të ditur se faza e modelimit veçse ka përfunduar. Shumë shpejt do të përfundojë faza e gipsit dhe puna do të kurorëzohet me derdhjen në bronz të statujës së Fadil Vokrrit, e cila do të ketë një vijë vertikale 3.5 metra.

“Shpirtin e Fadilit vërtetë nuk e pasqyron asnjë statujë sepse madhështia e tij dominon secilën skalitje. Sidoqoftë, vetëm kështu do ta ruajmë të përjetshëm kujtimin për të, të përjetësuar për vendin ku ai dha gjithë dijen, potencialin e energjinë”, deklaroi ministrja Dumoshi me rastin e inspektimit të fazës së punimit të statujës së Vokrrit.