Titulli racist i gazetës “Corriere dello Sport” ngjall reagime në Itali

Titulli racist i gazetës “Corriere dello Sport” ngjall reagime në Itali

05 December 2019 18:39

Klubi i Romës ka reaguar ndaj titullit “Black Friday”, që e përdori gazeta italiane “Corriere dello Sport”, duke thënë se është veprim i gabuar i këtij mediumi.

Titulli i shoqëruar me fotografitë e mbrojtësit të Romës, Chris Smalling dhe sulmuesit të Interit, Romelu Lukaku, ishte bërë para derbit të së premtes mes këtyre dy ekipeve.

“Qëllimi i artikullit të gazetës ishte pozitiv. Por titulli ka lënë në hije gjithë mesazhin kundër racizmit që përmbante ky artikull”, ka thënë Paul Rogers, zyrtar i lartë i Romës.

I menjëhershëm ka qenë edhe reagimi i Interit që tha se do të kundërshtojë çfarëdo forme të diskriminimit, transmeton Koha.net.

“Futbolli është pasion, kulturë dhe vëllazëri. Ne gjithmonë do të kundërshtojmë diskriminimin”, ka shkruar Inter në rrjetet sociale.

Ndaj artikullit të gazetës ka reaguar edhe klubi i Milanit që deklaroi se është shembull tipik i injorancës mbi racizmin.

Gazeta “Corriere dello Sport”, ka tentuar të mbrojë artikullin duke thënë se ishte lëshim i paqëllimshëm.

“Të bardhë, të zinj, të verdhë. Të mohojmë dallimin është një gabim tipik i racizmit që shprehin anti-racistat”, thuhej në një editorial të gazetës italiane.

Interi është lider i Serie A me 37 pikë, derisa Roma pozicionohet në vendin e pestë me 28 pikë.

© KOHA. Të gjitha të drejtat janë të rezervuara.

Komentet

Shto koment

Të ngjashme