FFK-ja shkarkon zv/sekretarin Arianit Ahmeti i cili “u vetëkandidua” për kryetar të FFK-së Foto: FFK

FFK-ja shkarkon zv/sekretarin Arianit Ahmeti i cili “u vetëkandidua” për kryetar të FFK-së

04 December 2019 18:13

Komiteti Ekzekutiv i FFK-së ka mbajtur sot mbledhjen e radhës në të cilën, veç tjerash, ka marrë vendimi për shkarkimin e zëvendëssekretarit të deritashëm të federatës, Arianit Ahmeti.

Këtë vendim, KE i FFK-së thotë ta ketë marrë “bazuar në shkeljet e tij flagrante, duke u vetëkandiduar për kryetar të FFK-së si dhe duke kërkuar nënshkrime nga delegatët e kuvendit, me çka dëmtoi imazhin e FFK-së dhe të futbollit të Kosovës, si dhe shkeli rëndë kodeksin e mirësjelljes, statutin e FFK-së dhe të gjitha normat morale dhe profesionale”.

KE i FFK-së tha se interesat grupore, klanore apo individuale “janë duke punuar në dëm të futbollit dhe atë pikërisht në kohën kur Kosova është në vlugun më të madh të përgatitjeve para ndeshjes historike me Maqedoninë e Veriut, e cila do të zhvillohet në mars të vitit të ardhshëm, e më pas eventualisht edhe në finale pas 5 ditësh, ku Kombëtarja jonë ka mundësinë historike për kualifikim në Euro 2020”.

Ahmeti të hënën zyrtarizoi kandidaturën e tij për kryetar të ardhshëm të FFK-së. Madje, Ahmeti deklaroi se ka plotë 41 vota pas tij.

Gjithashtu KE mori vendim që të zbatohet masa e suspendimit deri në vendimin përfundimtar për Bajram Zeqirin, “i cili keqpërdori detyrën e tij, duke paraqitur shkresë të paautorizuar në MKRS, pasi ai as nuk është delegat i Kuvendit të FFK-së dhe as nuk është i autorizuar për veprime të tilla”.

“KE i FFK-së vlerëson se është koha e fundit që të ndalen këto veprime të paskrupullta nga njerëz të pandërgjegjshëm dhe rekomandon që tashmë është koha të vihet si primar interesi i përbashkët i Kombëtares sonë para një momenti historik që kemi para vetes. KE inkurajon delegatët e Kuvendit se këto janë vetëm veprime të grupit të interesave dhe FFK dhe presidenti Ademi e kanë mbështetjen e plotë të asociacioneve të larta të futbollit si UEFA e FIFA. KE i FFK-së falënderon opinionin e gjerë për përkrahjen e vazhdueshme dhe të parezervë ndaj FFK-së dhe presidentit Ademi në mbarëvajtjen e suksesshme të Federatës së Futbollit të Kosovës, duke sqaruar edhe njëherë se presidenti Ademi e ka mandatin e rregullt deri në vitin 2022, i zgjedhur me përkrahje unanime të delegatëve të Kuvendit të FFK-së më 6 korrik të vitit 2018”, thuhet në komunikatën e FFK-së.

Ndër të tjera, në këtë mbledhje është diskutuar edhe për stinorin e posapërfunduar vjeshtor, të cilin KE i FFK-së e konsideroi shumë të rregullt dhe me ngritje të cilësisë.

Po ashtu, u konstatua se edhe në aspektin financiar ka ngritje të investimeve në disa klube, gjë e cila i jep kampionatit një dimension më të fortë garues.

Edhe garat në Ligën e Parë u vlerësuan interesante dhe me rrjedhë të rregullt, ashtu sikurse edhe garat në Ligën e Dytë dhe në Ligën e Femrave. Ndërkaq, garat në futsall u cilësuan me rrjedhë interesante dhe të rregullt, por u vlerësua se duhet një riorganizim me qëllim të ngritjes së cilësisë së garave.

Gjatë mbledhjes u diskutua edhe ndarja e drejtësisë në garat e këtij stinori, që ishte një segment i ndjeshëm edhe në këtë edicion dhe KE do të mundohet të gjejë forma avancuese, duke vlerësuar instalimin e sistemit VAR në formë të aplikimit eksperimental.

Në këtë mbledhje u shqyrtuan edhe disa pika tjera, ndër të cilat KE vendosi të ndihmojë financiarisht familjen Abazi, e cila humbi dy djemtë e saj në tërmetin e ndodhur në Shqipëri.

© KOHA. Të gjitha të drejtat janë të rezervuara.

Komentet

Shto koment

Të ngjashme