Mabetex Prishtina e mbylli aventurën në garën FIBA Eurocup Women, në ndeshjet si vendëse.
Vashat e kryeqytetit në duelin e fundit në Pallatin e Rinisë dhe të Sporteve në Prishtinë pësuan disfatë të thellë nga MBA Moska, 101:42, që ishte edhe humbja e katërt nga po aq ndeshje.
Në këtë përballje, prishtinaset e patën vetëm një herë avantazhin në të mirë të vet, kur pikët e para të ndeshjes i shënoi Irma Konjusha. Konjusha madje ishte basketbollistja më e dalluar te skuadra e drejtuar nga trajneri Fidan Shatri, me 18 pikë, 5 kërcime e 7 asistime.
Vendëset u mbajtën mirë në çerekun e parë, madje një minutë e 14 sekonda pa përfunduar 10-minutëshi i parë, rezultati ishte vetëm 17:15 në të mirë të mysafireve nga Rusia.
Megjithatë, përvoja e skuadrës vizitore bëri që ato të vazhdojnë me lojë të mirë deri në fund të duelit, ku epërsia e tyre vetëm sa shkonte e thellohej më shumë, me ndeshjen që përfundoi me 59 pikë më shumë për MBA Moskën.
Vetëm 4 basketbolliste të Prishtinës shënuan të enjten në mbrëmje. Veç Konjushës, 12 pikë e nëntë kërcime pati Myers, Enxhi Xanaj shënoi 10 pikë, dy kërcime e dy asistime, ndërsa Era Shatri shënoi 2 pikë, 2 kërcime e 1 asistim.
Takimi i radhës për ekipin debutues në këtë garë, Mabetex Prishtinën, do të jetë ai i 27 nëntorit, në shtëpi te Spartak Vidnoje.
-
7 nëntor 2019 23:08
-
Shpërndaje në: