FBK e zhgënjyer me mosmiratimin e Ligjit për Tatimin e të Ardhurave në Korporata

Federata e Basketbollit të Kosovës (FBK) është e zhgënjyer dhe e befasuar me hezitimin e disa deputetëve të Kuvendit të Kosovës për të mos e kaluar Ligjin për Tatimin e të Ardhurave në Korporata në Kuvend, përkatësisht amendamentin, i cili do t’i hapte rrugë Ligjit të Sponsorizimit në fushën e sportit, kulturës e rinisë.

“Me këtë veprim të deputetëve sporti, përkatësisht basketbolli kosovar vetëm se e ka bërë një hap prapa, duke marr parasysh gjendjen financiare në klubet kosovare, ku mungesa e sponsorëve në disa vitet e fundit është kryekëput e lidhur me mosmiratimin e këtij ligji dhe amendamenti”, thuhet në reagim.

FBK iu bën thirrje të gjithë deputetëve ta mbështesin këtë ligj dhe ta votojnë në seancën e radhës dhe kështu me votën e tyre të bëhen pjesë e zhvillimit të sportit kosovar.

Komiteti Ekzekutiv i Federatës së Futbollit të Kosovës kërkon nga Kuvendi i Kosovës që sa më parë, në seancën e radhës, të votojë amendamentimin e Ligjit për Tatimin e të Ardhurave në Korporata, i cili e mundëson harmonizimin me Ligjin për Sponsorizim, i cili është jetik për zhvillimin e sportit dhe në veçanti për futbollin, bën të ditur FFK-ja përmes faqes zyrtare.

FFK-ja thotë se mosmiratimi i këtij Ligji në seancën paraprake ka zhgënjyer tej mase komunitetin sportiv dhe njerëzit që për shumë dekada kanë qenë afër sportit, e të cilët nuk kanë kursyer asgjë për ta mbajtur gjallë aktivitetin e klubeve

“Ne, si KE i FFK-së, i bëjmë thirrje deputetëve të Kuvendit të Kosovës që në seancën e radhës të jenë në numër të mjaftueshëm dhe ta kalojnë amandamentimin e këtij ligji, ngase kjo do të ishte përkrahja e tyre më e madhe për sportin në këtë periudhë”, thuhet në faqen zyrtare të FFK-së.

Tutje thuhet se në kohën kur sporti ynë po i radhit sukseset e njëpasnjëshme e kur futbolli është bërë ambasadori më i mirë i vendit në botë dhe sukseset e djemve tanë të Kombëtares po na bëjnë krenarë të gjithëve, është obligim i secilit prej nesh që të jemi të përgjegjshëm dhe të punojmë për ta përkrahur sa më shumë sportin.

“Miratimi i këtij ligji i hap rrugë zhvillimit të futbollit dhe klubeve tona dhe njëherësh ua mundëson dhe i josh kompanitë e shumta që t’i përkrahin klubet e futbollit për zhvillim edhe më të hovshëm, por krijon mundësi edhe për përmirësim të infrastrukturës. FFK falënderon të gjithë deputetët që po i japin mbështetje këtij ligji dhe shpreson se në seancën e radhës amandamenti që mundëson harmonizimin e këtyre ligjeve do të kalojë me shumicë votash”, thotë FFK.

Sipas FFK-së, sportistët po e bëjnë punën e tyre me krenari e përgjegjësi në çdo arenë, tani mbetet radha e deputetëve që të dëshmojnë se janë përkrahës të njëmendtë të zhvillimit të sportit, duke e votuar Ligjin në fjalë.

Mos kalimi i Ligjit për Tatimin e të Ardhurave në Korporata në Kuvend, përkatësisht amendamenti, i cili do t’i jepte rrugë të menjëhershme Ligjit të Sponsorizimit në fushën e Sportit, Kulturës e Rinisë, ka befasuar gjithë komunitetin e sportit, të cilët kanë shprehur zhgënjimin e madh me hezitimin e disa deputetëve të Kuvendit të Republikës së Kosovës.

Përmes një komunikate për media Komiteti Olimpik i Kosovës, si institucioni më i lartë sportiv në Kosovë, thotë se ka mbetur tejmase i habitur se si një amendament i cili e dërgon përpara zhvillimin e sportit në Kosovë, i cili do të krijonte qindra e mijëra vende të reja të punës, do ta ulte shkallën e informalitetit, e do e ndalte valën e largimit të rinisë nga Kosova, nuk gjeti përkrahjen edhe nga deputetët, të cilët jo rrallë herë dinë të krenohen me arritjet e sportistëve.

KOK-u iu bën thirrje të gjithë deputetëve hezitues që ta mbështesin këtë Ligj dhe këtë amendament, sepse me të do të mbështesin sportistët e Kosovës, do të mbështesin fëmijët e tyre duke i larguar ata nga rrugët devijante.

“Sportistët tanë janë ata që po na bëjnë të lumtur e krenarë me rezultatet kulminante, duke e promovuar e lartësuar flamurin dhe Shtetin e Kosovës në gjithë botën, madje edhe në vendet ku deputetëve të Kosovës dhe gjithë të tjerëve iu mohohet edhe hyrja. Duam të ju rikujtojmë se numri i klubeve në Kosovë, në vend se të vazhdon rritjen, nga dita në ditë po e vazhdon rënien, duke bërë që shumë klube, madje edhe ato më me nam të gjejnë shuarjen, në vend të gjetjes së përkrahjes nga sponsorët dhe nga institucionet e Republikës së Kosovës”, thuhet në komunikatë, transmeton Koha.net.

KOK-u shton se ndërkombëtarizimi i sportit pas luftës ishte synimi më i madh i të gjitha sporteve, ndërsa shumë sosh, detyrohen sot 20 vite pas lufte që shkaku i mos përkrahjes së mjaftueshme financiare, të mos arrijnë të marrin pjesë në gara ndërkombëtare.

“Andaj, duke besuar se mos votimi i këtij ligji nga deputetët ishte jo i menduar mirë, ju bëjmë thirrje të gjithë deputetëve të Kuvendit të Republikës së Kosovës, që këtë ligj ta votojnë në seancën e radhë dhe kështu me votën e tyre të bëhen pjesë e një zhvillimi të hovshëm të sportit të Kosovës”, thuhet në komunikatë.

© KOHA. Të gjitha të drejtat janë të rezervuara.