Arsenali gabon ndaj Brightonit, gjasa minimale për kualifikim në “Champions”

Arsenali është ndalur vetëm baras me Brightonin në xhiron e 37-të të Premier Ligës për të mbetur me shanse minimale për kualifikim në Ligën e Kampionëve.

Ekipet barazuan 1 me 1 me dy golat të realizuar nga penaltitë. Për Arsenalin shënoi Pierre-Emerick Aubameyang, ndërsa për mysafirët realizoi Murray pas një penaltie të shkaktuar nga Granit Xhaka.

Arsenali mbetet i pesti në tabelë me 67 pikë, tri prapa Tottenhamit që mbyll top-katërshen. Arsenali për t’u kualifikuar tutje duhet të shpresojë që Tottenhami të humbë në ndeshjen e fundit e “Topçinjtë” të përmbysin golallimin prej 8 golash në krahasim me rivalët londinezë.

Granit Xhaka ka shkaktuar një penalti të pazakontë në përballjen e Arsenalit me Brightonin në Premier Ligë.

Mesfushori shqiptar shkaktoi penalti duke ndërhyrë pa nevojë në një kundërshtar të cilin s’mund ta zinte duke ia mundësuar Brightonit të barazojë rezultatin në 1 me 1 në përballjen e vlefshme për xhiron e 37-të në Premier Ligë.

Për penaltinë, Xhaka u ndëshkua me karton të verdhë.

© KOHA. Të gjitha të drejtat janë të rezervuara.