Ademi e quan për lakmi stinorin vjeshtor në futbollin e Kosovës

Ademi e quan për lakmi stinorin vjeshtor në futbollin e Kosovës

09 December 2018 23:40

Stinor për lakmi e ka quajtur kryetari i Federatës së Futbollit të Kosovës, Agim Ademi, pjesën e parë të sezonit 2018/19 në Kosovë.

Në një publikim në faqen e FFK-së, Ademi ka thënë se ndihet krenar me atë që kanë treguar të gjithë aktorët e futbollit në stinorin vjeshtor.

Në letrën e tij, Ademi e ka quajtur këtë stinor si më të mirin deri më tash në Kosovë.

“Sot, pikërisht në 6 mujorin e vdekjes së ish-presidentit legjendar, Fadil Vokrri, ka rënë edhe perdja e stinorit vjeshtor në të gjitha garat e futbollit tonë. Dhe vërtet jam i nderuar dhe krenar me atë çfarë kanë treguar gjatë këtij stinori klubet, gjyqtarët, zyrtarët dhe dashamirët e futbollit, pasi garat kanë pasur një rrjedhshmëri për lakmi, duke qenë ky një kampionat shembull. Andaj, fillimisht uroj tetë skuadrat që kaluan tutje në çerekfinale të Digitalb Kupës së Kosovës dhe njëherësh i falënderoj klubet për përfundim të dinjitetshëm dhe të rregullt të garave, duke e shndërruar këtë stinor si më të mirin deri më tash”, ka shkruar Ademi. “Përgëzoj Prishtinën që e mbylli stinorin vjeshtor si lidere dhe uroj që klubet të kenë një pushim të këndshëm dhe aktiv, derisa futbollistët uroj të kenë shëndet dhe të përgatiten sa më mirë për stinorin pranveror, në mënyrë që ta mbyllim këtë kampionat në mënyrën më të mirë dhe që t’ua mundësojmë ekipeve fituese të kampionatit dhe të kupës që të jenë sa më të suksesshme në garat evropiane”.

Ademi ka shtuar se rregullsia e garave në këtë stinor duhet të shërbejë si nxitje që të gjithë të punojnë në ngritjen e nivelit të organizimit të klubeve, ndeshjeve dhe cilësisë së kampionatit.

Në fund ai ka falënderuar edhe tifozët, teksa është zotuar se do të ndërmerren masa disiplinore ndaj të gjithë atyre që do të tentojnë të prishin imazhin e futbollit kosovar.

“Gjithsesi, rregullsia e garave në këtë stinor duhet të na nxisë të gjithëve që të punojmë së bashku për ta ngritur edhe më shumë nivelin e organizimit të klubeve dhe ndeshjeve, ngase në këtë mënyrë do ta rrisim edhe cilësinë e kampionatit tonë, por edhe shikueshmërinë në stadiume. Po ashtu, falënderoj tifozët e të gjitha ekipeve për anim korrekt, derisa për ata që tentuan ose do të tentojnë në të ardhmen që të prishin imazhin e mirë të futbollit kosovar sigurisht se do të ndërmerren masat disiplinore, pasi qysh në fillim jam zotuar se ndaj dukurive negative do të ketë zero tolerancë”, ka shkruar më tej ai.

© KOHA. Të gjitha të drejtat janë të rezervuara.

Komentet

Shto koment

Të ngjashme