Një ditë me mantelbardhët që ndihmojnë pacientët të luftojnë kancerin

Në Klinikën e Onkologjisë në Qendrën Klinike Universitare të Kosovës, çdo ditë marrin shërbime rreth 280 pacientë.

Klinika e Onkologjisë, sipas drejtorit të kësaj klinike, Ilir Kurtishi, funksionon me dy shërbime kryesore: shërbimin e kimioterapisë dhe atë të radioterapisë.

Stafi shëndetësor i Klinikës së Onkologjisë 24 orë është në shërbimin e pacientëve, të cilët e bëjnë një punë të jashtëzakonshme në shërimin e të prekurve me sëmundje të rënda.  

Në këtë klinikë në shërbimet ditore punojnë 13 mjekë që ofrojnë konsulta dhe mjekime për pacientët. Ndërsa në radioterapi janë 5 specialistë që merren me trajtime radioterapeutike.

Vildane Goga-Çmega, që është shefe e shërbimit të kimioterapisë, apelon që të bëhen kontrolle të rregullta, sepse zbulimi i hershëm i kancerit shpëton jetë.

Në këtë klinikë, përveç stafit mjekësor, punojnë edhe ekspertë të fushave të tjera të rëndësishme, si fizika mjekësore dhe fizioterapia. 

Burim Uka, si shef i shërbimit të fizikës mjekësore dhe mbrojtjes nga rrezatimi, tregon se gjatë ditës trajtojnë rreth 70 pacientë. 

Thotë se klinika është pajisur me aparatura të reja dhe moderne, që e bëjnë trajtimin më të sigurt për pacientët. 

Valmira Bajrami, që me profesion është fizioterapeute në Klinikën e Onkologjisë, thekson se së fundmi janë arritur disa shërbime që më herët nuk kanë qenë të mundshme për pacientët.  

Ajo thekson se Klinika e Onkologjisë përpiqet të ofrojë trajtime më cilësore për pacientët që përballen me sëmundjet e kancerit.

Drejtori i Klinikës së Onkologjisë, Ilir Kurtishi, ka theksuar se këtë vit janë identifikuar dhe regjistruar në klinikë mbi 330 raste me kancer të gjirit, shifër afërsisht e njëjtë nga viti paraprak.