Çantat nga Fahrija, shumë të kërkuara jashtë vendit

Përmes këtij materiali do të njoftohemi me motrat Fahrije dhe Selvete, të cilat thurjen me grep dhe shtiza e kanë mësuar qysh në fëmijëri. Së fundmi punimet i kanë ekspozuar në rrjetet sociale, ku menjëherë janë vërejtur nga të tjerët.

Hapëse të kënaçeve, kabllo elektrike e copëza nga gjësende të vjetra janë vetëm disa nga materialet që Fahrije Sekiraqa i përdor për të punuar çanta.

Fahrija, e cila që nga mosha 10-vjeçare ka filluar të punojë me grep e shtiza, ia dedikon pjesën më të madhe të kohës këtij zanati.

Thotë se ndjenjat, të cilat i përjeton gjatë kohës kur i ka shtizat a grepin në dorë, janë të papërshkrueshme.

E mban mend shallin e parë që e ka thurur me telat e metalit nga një ombrellë prej pamundësisë për të blerë shtiza.

E këtë zanat, të cilin e do kaq shumë, nuk ka kaluar as një muaj i plotë prej kur ka filluar ta kthejë edhe në një veprimtari fitimprurëse, bashkë me motrën e saj, Sevdijen.

Me madhësi, ngjyra e modele të ndryshme, çantat tashmë po pëlqehen shumë nga të tjerët, që motrat po i punojnë.

Deri në krijimin e markës së tyre, që e kanë emërtuar “Baggi”, çantat kryesisht i kanë dërguar jashtë vendit.

E edhe tash ato po kërkohen e po vlerësohen më shumë nga klientë të huaj, sidomos prej atyre nga Maqedonia.

Çmimet e çantave “Baggi” fillojnë nga 20 deri në 50 euro.

Nga disa këto çmime po konsiderohen të larta, mirëpo motrat thonë se duke filluar nga blerja e materialit e deri tek përfundimi i produktit është një punë me shumë përkushtim.

E edhe fakti që secila nga to është unike ndikon në çmim.

Me shpresën që puna do t’ju shkojë mbarë, ato tashmë e kanë planifikuar që një pjesë të fitimeve t’i dhurojnë për organizata qeveritare.