Ka një kohë të gjatë që ditën e kalon vetëm në punëtorinë e ndërtuar afër shtëpisë së tij.
Aty, Enver Hajzeri, mjeshtër i punës me dru nga e cila krijon instrumentet tradicionale muzikore, thotë ta gjejë qetësinë më të madhe e të punojë me përkushtim në profesionin e tij.
Punimi i një çiftelie, sipas tij, duhet të kalojë nëpër disa faza, të cilat Hajzeri i demonstroi për emisionin “Sot”.
“Këtu e kam punëtorinë ku i vendosi veglat që përfundohen e ku klientët mund të vijnë t’i shohin e t’i marrin. Dikur për ta përfunduar një çifteli, më është dashur ndoshta 5-6 ditë, ndërsa sot, një çifteli e punoj deri në mbrëmje”, thotë Hajzeri.
Ai thotë se pos që i punon, ka edhe dëshirë t’u bie çiftelive. Thotë se me këtë vegël muzikore është marrë edhe para se të niste t’i punonte ato.
“Hera e parë që e kam pa si punohet çiftelia, ka qenë të Beqir Prelezi. I punoj edhe disa vegla tjera, siç është sharkia e violina. Më së shumti këto instrumente i punoj me dru arre, qershie, por edhe prej bungu”, shton ai.
Edhe
Sekuestrohet një armë zjarri pas disa të shtënave në Jezerc të Ferizajt
Përveç mjeshtërisë së këtyre instrumenteve, Enver Hajzeri nga Koliqi i Prishtinës ia thotë mirë edhe këngës. Por ka edhe një dëshirë.
“Kam pas dëshirë djemtë e mi me më trashëgu, po nuk i punojnë këto instrumente, vetëm se dinë të luajnë në to, andaj jam i kënaqur për këtë”, thotë ai.
Puna e tij vazhdon të jetë tejet e kërkuar, në veçanti nga admiruesit e muzikës folklorike, por do të dëshironte që edhe gjeneratat e reja të praktikonin një rrymë të tillë.
