24 orë me ushtarët e ardhshëm të Kosovës

Për secilin kadet rregulli i parë i mëngjesit është aktiviteti fizik.

Pas ushtrimeve secili ka detyrë që të përkujdeset për higjienën.

Pas kësaj kadeti rikthehet në dhomën e vet për të rregulluar shtratin e pastaj bëhet gati për rreshtim.

Jo vetëm shtrati që duhet të jetë i rregulluar. Dhoma e një kadeti duhet të ketë pastërti. Gjithashtu edhe dollapi ka rregull në organizimin e rrobave.

Pas tërë këtyre përgatitjeve, kadeti është i gatshëm të veshë uniformën e Kosovës.

Me të përfunduar inspektimi i rreshtimit, kadeti vazhdon ditën me ligjëratat që duhet të ndjekë gjatë studimeve në Qendrën e Studimeve Universitare.

Nysret Llapashtica, si instruktor, për detyrë ka që kadetët të jenë të gatshëm për udhëheqje e të mësojnë aspektin taktik.

Llapashtica tregon se përvoja e tij dikur si kadet e ka mësuar shumë ashtu siç ndodh për 4 vjet me radhë me secilin kadet.

Për të kuptuar më mirë jetën e një kadeti nga afër është koha të takohemi me Vesa Blytën, kadete në vitin e dytë të studimeve.

Vesa gjithmonë kishte dashur të kontribuonte për atdheun e saj, e dëshira për të studiuar në Akademinë Ushtarake kishte rrjedhur nga vëllai i saj i madh, i cili tanimë është oficer i Forcës së Sigurisë së Kosovës.

Karriera ushtarake është rruga, të cilën e ka synim kadetja e re.

Artet marciale, noti e sportet e tjera janë pjesë të cilat kadetët mund t’i zgjedhin në kohën e lirë.

Si njërën ndër njësitë më të rëndësishme në FSK e sheh komandant Albian Ajvazi qendrën e studimeve universitare.

Janë gjithsej 28 module të ndryshme, të cilat i mësojnë kadetët brenda 4 vjetëve.

Pos Akademisë, kadetët kanë për detyrë të përfundojnë studimet edhe në Universitetin Amerikan në Kosovë.

Program tjetër me shumë rëndësi është udhëheqja, ku qysh nga viti II kadetët e ushtrojnë si aftësi.

E në qershor të këtij viti kadeti Pashtrik Kryeziu do të diplomojë. Këtë përvojë tashmë 4-vjeçare e cilëson si pjesën më të bukur të jetës.

Pashtriku thotë se është krenar që ka vendosur të ndjekë studimet në Akademi dhe nuk pendohet kurrë.

“Vizioni im është më i madh sesa vetja ime”- është një ndër motot e Pashtrikut.

Vikendet janë mundësi që ushtarët e ardhshëm t’i kalojnë me familjen, derisa qëndrojnë në kazermën “Adem Jashari” dita për ta përfundon në orën 22:00.

© KOHA. Të gjitha të drejtat janë të rezervuara.