SOT

Shtëpia mbi 300-vjeçare në Mitrovicë, historia dhe ruajtja e saj

Mendohet të jetë ndërtuar mbi 300 vjet më parë dhe ndonëse është vjetruar ende qëndron në këmbë.

Kjo shtëpi është ndër më të vjetrat në rrethinën e Mitrovicës.

Adnan Koroglu, njëri nga trashëgimtarët e saj, ka thënë se shtëpia është trashëguar brez pas brezi duke i rezistuar kohës.

Dikur shtëpia e familjes Koroglu bënte konak mysafirë nga vendet e ndryshme, ndërsa prej pasluftës është e pabanueshme dhe duke u shkatërruar.

“Ekspertët e kanë vlerësuar shtëpinë që daton dikur 300-350- vjet më parë. Ndryshe është ndër 5 shtëpitë më të vjetra në Mitrovicë. Kjo është shtëpia e familjes Koroglu nga këtu e kam stërgjyshin, gjyshin, babai dhe ne 3 vëllezërit po e trashëgojmë këtë shtëpi”, tha Koroglu.

Jo vetëm vjetërsia, por edhe stili i ndërtimit e renditja e dhomave e bëjnë shtëpinë të veçantë.

“Shtëpia është e ndërtimit me arkitekturë osmane. Ka një dhomë të madhe, ngjitur me të janë 4 dhoma 1 korridor dhe një “qyshk” ndryshe thirret lloj i ballkonit ku në çdo mëngjes kem pi çaj. Në katin e parë janë 2 dhoma korridori, kuzhina dhe banjë e ndërtuar më vonë. Ndryshe e kemi pasur edhe kuzhinën verore në oborr që janë gatuar ushqimet në mënyrë që të ruhet shtëpia nga zierjet”, tha Koroglu.

Shtëpia e familjes Koroglu, është shtëpia më e vjetër e qytetit të Mitrovicës, e cila është edhe pjesë e listës së trashëgimisë kulturore.

Megjithatë, familjarët thonë se shteti nuk bëri kurrë asgjë për ta mirëmbajtur objektin e veçantë.