Tash e 10 vjet njihet si fotograf i botës së egër.
Gatishmëria e tij për të eksploruar natyrën, e dëshmon pasionin që ka për të shkrepur fotografi nga kjo botë.
Ky është Arian Mavriqi, fotografi i botës së egër, i cili është nisur drejt Ropotovës së Kamenicës, ku qëllimi i tij është shkrepja e ndonjë specieje nga bota e egër. Ndër të tjerash, ai tregon se ka arritur t’i fotografojë kafshë të rralla e që nuk kanë ekzistuar as në të dhënat shtetërore.
“Ky është njëri prej territoreve që unë e frekuentoj më së shumti për arsye të habitatit që e ka të grabitqareve, por edhe për disa lloje të shtazëve të egra siç janë ujku, dhelpra, lepuj të egër. Kjo pjesë përveç që është tokë e punueshme, ka dhe brejtës dhe për grabitqaret është territori i tyre. Llojet si shqiponja, skifter, qafka ushqehen në këtë zonë. Këtu i kam fotografuar disa lloje të shqiponjave sikurse që janë lloji i shqiponjave me emër çifti i tij. Kjo fotografi ka qenë e realizuar për herë të parë në Kosovë”, ka deklaruar Mavriqi.
Mavriqi thekson se është me rëndësi të jesh në vendin dhe kohën e duhur për të shkrepur foto që më pas, informon publikun me shumë të panjohura nga kjo botë.
Si fëmijë ai kishte pasion të hulumtonte në natyrë, por asnjëherë nuk i kishte shkuar mendja që një ditë do të ketë mundësi që gjithë ato pamje eksploruese do t’i dokumentonte përmes fotografisë. Gjithçka filloi nga një telefon mobil, ku vite më parë fotografonte gjithçka që i shihte syri. Ndërsa, sot është njëri ndër fotografët më të spikatur në vend.
“Jam rritur me këta lumenj në këtë qytet. Që fëmijë kam pasur dëshirë të fotografoj dhe në atë periudhë nuk kam pasur shumë mundësi si fillim jam njoftuar me natyrën boten e egër dhe krejt çka kam pasur mundësi të bëj i kam shpjeguar se çfarë kam parë, më vonë më erdhi mundësia që të bëhem më një telefon dhe që atëherë kam filluar të fotografoj botën e egër. Pasi u informova për botën e egër, kuptova që në Kosovë ka nevojë për promovimin e specieve të rralla përmes fotografisë”, ka thënë ai.
Dokumentimi i formave të ndryshme të jetës së egër po bëhet gjithnjë e më tërheqës, sipas Mavriqit, në Kosovë ky dokumentim është i vonshëm. Por, me zhvillimin e teknologjisë, bota e egër e Kosovës është vënë në pah jo vetëm te ne, por edhe nëpër botë.
“Për herë të parë në shqiptari zbuluam një lloj të lejlekut të zi që ishte diçka e papritur, kur mos thuaj kurrë, gjithmonë gjendet një mundësi dhe e gjetëm folenë dhe e realizuam xhirimet. Fotografuam një tufë me lejlekë të zinj të cilët kishin unazuar nga Hungaria dhe përmes GPS rruga e tyre është drejt Izraelit. Kemi fatin që i kemi unazuar edhe ne dhe shpresoj të na lajmërojë dikush edhe ne në cilin vend të botës kanë shtegtuar”. Është një risi për ne dhe interesimi në të ardhmen edhe t’i vendosim edhe GPS, sepse këtë vit ishte e pamundur shkaku i buxhetit dhe kohës”, shtoi Mavriqi.
Ai tregon edhe për vështirësitë gjatë realizimit të fotove në natyrë që mund të has çdo fotograf. Në këtë rast, edhe shteti duhet të jetë mbështetës si nga ana financiare po edhe morale.
“Të investojnë në dukuri, teknikë, sepse edhe unë kam hulumtuar për llojet e specieve, pasazhet etj. Në fotografi ka rëndësi të madhe dhe fokusi se çka dëshiron të fotografosh. Të besojnë në vete dhe të realizojnë fotografinë brenda mundësive të mos dalin jashtë kornizave të tyre. Kemi vështira zakonisht nga ana teknike, na duhet mbështetje më e madhe nga ana e shtetit, sepse ne nuk pasurohemi nga ana financiare, por pasurohemi nga dhënia e informative për shtetin. Ka vështirësi në terrene kemi mungesë të makinave, terrene të vështira sidomos, ka rreziqe. Ariu, ujku, dhia e egër, sorkadhja ekzistojnë rreziqe të shumta. Dëshira e madhe i kalon të gjitha sfidat që i kemi përpara”, u shpreh ai.
Ndër të tjerash, Mavriqi ka eksploruar shumë vende të Kosovës dhe jashtë kufjeve të saj, por vlen të ceket se fotografitë e tij, u komentuan edhe nga gjigandi botëror, Microsoft, e të cilin Mavriqi e vlerëson si një sukses kombëtar.
Nga shumë krijesa të botës së egër, Arian Mavriqi ka arritur t’i fotografojë edhe lejlekun e zi, dhelprën e kuqe, bilbili i ujit, shqiponjë ospry- çifti i zi, ujku i zi e të tjera.
© KOHA. Të gjitha të drejtat janë të rezervuara.
