SOT

Këngët që iu dedikuan fëmijëve gjatë luftës në Kosovë

Kënga “Lule mbi banka”, që ka për subjekt nxënësit që mungojnë në shkollë, interpretuar nga Shyhrete Behluli, vazhdon të dëgjohet edhe sot e asaj dite, si kujtim për fëmijët që vdiqën në luftën e fundit, 22 vjet më parë.

Afërsinë me Kosovën e ka shkrirë në vargje edhe një britanik, që në Kosovë shërbeu si ushtar i forcave paqeruajtëse të KFORIT, të cilat intervenuan për çlirimin final të vendit. Ndjenjat që ia fali Kosova dhe njerëzit e saj James Blunt i këngëzoi në vargje të mbushura me tone dhimbjeje e mërzie për ngjarjen famëkeqe.

“Shtëpi të shkatërruara nga djegia,

aromë vdekjeje në ajër,

një grua që qan e pa pikë shprese thotë:

‘Ai ka qenë këtu!’

Është radha e familjes tjetër të vdesë,

një fëmijë që ka frikë edhe të dënesë.”

Kjo është një copë nga kënga “No bravery” e Bluntit, i cili kishte mbajtur një video-ditar gjatë shërbimit ushtarak në Kosovë, vend për të cilin foli prapë pas disa vjetësh.

“Është e trishtë kur sheh vende të përfshira nga dhuna e madhe, që shfaq anën më të shëmtuar të njerëzimit. Të shkosh në këto vende për t’ia kujtuar vetes se sa me fat je.”

“Derisa nënat humbin fëmijët nëpër luftëra, jam i uritur e kam të ftohtë, nuk kam kë ta përqafoj, nëna dhe babai kanë vdekur... Ku e kam vendin unë..? – është një pjesëz nga kënga “Fëmijët e Kosovës”, kënduar nga “The Kelly Family.”

Teksti, ndër të tjerash, bën thirrje për ndihmë fëmijëve që po vdisnin nëpër zona lufte.

Në Kosovë janë mbi 1 mijë fëmijë të vrarë e të zhdukur.