SOT

Iniciativa e veçantë e gazetares

‘’E mira jem, e mira jote’’ është iniciativa e Leonora Aliut, gazetares nga Prishtina që përmes shitjes së rrobave të saj po synon ta ndihmojë një familje në nevojë.

Rrobat që ka blerë e nuk i ka veshur, ato që nuk i vesh më e rroba krejt të reja, ajo ka vendosur t’i shesë me çmime shumëfish më të lira përmes rrjeteve sociale.

Paratë e mbledhura nga shitjet ajo thotë se do t’i dhurojë për familjen në nevojë, derisa tregon se si ka ardhur deri te kjo ide dhe pse ka zgjedhur këtë formë të ndihmës.

E arsyen se pse nismës së saj i ka vënë emrin ‘’E mira jem është e mira jote’’ ajo e ndërlidh me konsumerizmin që çdo ditë sa vjen e rritet.

E bashkë me këtë fenomen, Aliu thotë se edhe varfëria sa vjen e bëhet më e madhe si pasojë e ndarjes joproporcionale të klasave shoqërore në vend.

Në vetëm katër ditë prej kur ka nisur të bëjë shitjen e rrobave, ajo thotë se është rritur edhe numri i ndjekësve që duan të dhurojnë e blejnë rroba nga i gjithë vendi.

Aliu shpreson që shumë të tjerë t’i bashkohen një nisme të tillë, që në të ardhmen të ndihmohen e punësohen edhe shumë familje të tjera.

Ndërsa esencial, sipas saj, mbetet theksi që duhet vënë në stigmatizimin që u bëhet familjeve e personave që vuajnë nga fenomeni i varfërisë.

Prej ditës kur ajo ka hapur llogarinë ‘’Leonora’s stuff’’ në rrjete sociale nga shitja e rrobave të saj janë grumbulluar mbi 80 euro.

Nga vullneti dhe solidarizimi që shoqëria kosovare e ka treguar për kauzën e saj, Aliu pret ta kalojnë këtë shumë.