“Prishtinë 2002” me identitetet e adoleshencës, premierë botërore në Francë
Mes 76 filmave në garë, “Prishtinë 2002” synon çmimin për filmin më të mirë ndërkombëtar
Prestigjiozi “Festival du court métrage de Clermont-Ferrand” është stacioni i parë i filmit të shkurtër “Prishtinë 2002” dhe kjo dëshmon edhe nivelin e filmit. Është në garë zyrtare në kategorinë ndërkombëtare dhe është përzgjedhur në konkurrencë me 7 mijë filma nga të katër anët e botës. “Më ka ardhur mirë, pasi prej rreth 7 mijë filmave në botë që kanë aplikuar prej 52 shteteve, veç 76 janë zgjedhur dhe ata e kanë audiencën e madhe”, ka thënë regjisorja e filmit, Trëndelinë Halili
Premium
Prestigjiozi “Festival du court métrage de Clermont-Ferrand” është stacioni i parë i filmit të shkurtër “Prishtinë 2002” dhe kjo dëshmon edhe nivelin e filmit. Është në garë zyrtare në kategorinë ndërkombëtare dhe është përzgjedhur në konkurrencë me 7 mijë filma nga të katër anët e botës. “Më ka ardhur mirë, pasi prej rreth 7 mijë filmave në botë që kanë aplikuar prej 52 shteteve, veç 76 janë zgjedhur dhe ata e kanë audiencën e madhe”, ka thënë regjisorja e filmit, Trëndelinë Halili
Në listën e filmave që vijnë si diplomaci kulturore ndërkombëtare për Kosovën, “Prishtinë 2002” është tjetër prodhim kinematografik që synon audiencën botërore. Stacioni i parë trashmë është zyrtarizuar. Premierën botërore do ta ketë në festivalin prestigjioz të filmit të metrazhit të shkurtër në Clermont-Ferrand të Francës, ku është në garë për çmimin e filmit më të mirë ndërkombëtar. Në rreth 20 minuta, filmi shpalos miqësinë e dy adoleshenteve ku tendencat e tyre për ta ndryshuar vetveten i çojnë në përballje me të papriturat.
Trëndelinë Halili, regjisore e “Prishtina 2002”, ka thënë se filmi synon festivale të tjera në radhë, ndërsa në Kosovë premierën mund ta ketë verën e ardhshme.
Në edicionin e sivjetmë të festivalit me traditë 45-vjeçare, “Festival du court métrage de Clermont-Ferrand” i cili mbahet prej 27 janarit deri më 4 shkurt, “Prishtinë 2002” e zhanrit fiksion me producent Ermal Gërdovcin, u zgjodh prej një garë me prej rreth 7 mijë filmave. Rrëfen historinë e një adoleshenteje e cila priret të transformojë vetveten për t’i bërë përshtypje shoqes së saj të ngushtë. Ndërkohë që gjatë tërë këtij rrugëtimi, personazhi kryesor ndeshet me të papriturën. Mes 76 filmave në garë, “Prishtinë 2002” synon çmimin për filmin më të mirë ndërkombëtar – një nga tri kategoritë garuese mes asaj kombëtare dhe filmave të krijuesve të rinj.
Rolin kryesor, atë të Letit, e luan Hana Limani, ndërsa karakterin e Donës e paraqet Rrezarta Haziraj. Xhirimet e filmit ishin zhvilluar gjatë verës së vitit të kaluar të cilat, sipas regjisores Halili, ishin karakterizuar me vështirësi të vazhdueshme për shkak të situatës me pandeminë.
“Njëra nga personazhet kryesore është më në linjë të fëmijërisë, ndërsa tjetra ka marrë hapa më të mëdhenj të adoleshencës dhe mundohet t’i imponojë gjërat te tjetra si shoqe të ngushta. Të dyja janë shumë të afërta me njëra-tjetrën, mirëpo ndryshimi mes tyre i bën dy personazhet të hyjnë në një lojë, në një të papritur”, ka treguar Halili në një përgjigje për KOHËN.
“Prishtinë 2002” rrëfen historinë e një adoleshenteje, e cila priret ta transformojë vetveten për t’i bërë përshtypje shoqes së saj të ngushtë
Ajo ka bërë të ditur se para premierës në Kosovë, synon edhe disa festivale tjera të mëdha. Filmin e ka konsideruar si rrëfim për shoqërinë, ndërsa garën si mundësi të mirë për premierë e shfaqje, për shkak të audiencës tejet të madhe.
“Më ka ardhur mirë pasi prej rreth 7 mijë filmave në botë që kanë aplikuar prej 52 shteteve, veç 76 janë zgjedhur dhe ata e kanë audiencën e madhe. Po bëhen paksa klishe me atë se pjesëmarrja ka rëndësi, por me të vërtetë ne kemi arritur që filmi të sigurojë shfaqje para një audience të madhe, normalisht është i mirëseardhur ndonjë çmim, por nuk përbën rol të madh në punën tonë”, është shprehur Halili.
Filmi jepet premierë më 31 janar dhe prezente do të jetë edhe regjisorja. Në kuadër të festivalit, “Prishtinë 2002” do të shfaqet tetë herë.
Festivali i filmit të metrazhit të shkurtër që mbahet në Clermont-Ferrand në Francë është një nga festivalet më të mëdha ndërkombëtare në botë dhe i dyti në Francë pas Festivalit të Cannes”, sa i përket audiencës. Ai angazhohet për të ofruar një gamë të gjerë veprash filmike me filma të zhanrit fiksion, fantashkencë, horror, dokumentarë e të tjerë. Edicioni i sivjetmë ka gjithsej 159 filma në garë.
“Prishtinë 2002” është prodhuar nga shtëpia filmike “Kandërr”, me mbështetje të Qendrës Kinematografike të Kosovës dhe Komunës së Prishtinës. Producenti Ermal Gërdovci është shprehur se suksesi i menjëhershëm i filmit është pritur, pavarësisht se nuk ka pasur kompani distribuimi.
“Kjo ka qenë eksperienca e parë e imja si producent. Ne e kemi pritur këtë sukses pasi e kemi parë që ka dalë mirë, na ka pëlqyer dhe e kemi ditur se ka potencial. Ka qenë ndjenjë e mirë pasi kur e ke mbështetjen institucionale, deshe a nuk deshe e ke një presion dhe kur e merr një lajm të tillë ndjehesh mirë pasi sheh se mundi nuk ka shkuar huq”, ka thënë Gërdovci.
“Festival du Court Métrage de Clermont-Ferrand” më parë kishte prezantuar edhe filma kosovarë si dokumentari “Pa Kosovën” i Dea Gjinovcit, një rrëfim për babanë e saj që ishte detyruar të largohet nga Kosova për më shumë se 30 vjet, pas pjesëmarrjes në demonstratat studentore. Mirëpo, filma të tjerë dokumentarë ishin realizuar në vitin 2000 nga regjisorë francezë për përjetimet e tyre gjatë luftës së fundit në Kosovë.
“Un maire au Kosovo” e Chris Marker ishte intervista me Bajram Rexhepin që ndiqte pozitën e tij si kryetar i Komunës së Mitrovicës. Aty paraqiten kosovarët si refugjatë të varfër dhe idenë se rrëfimi i intelektualëve kosovarë dhe përvoja e tyre për të nxjerrë konkluzione për të ardhmen nuk e kishte prekur botën nëpërmjet mediave. “Trip to Kosovo” e Saurabh Kolekar kishte paraqitur një baba që vuante nga dështimi i veshkave dhe që kishte vendosur të blinte një veshkë nga tregu i zi. Ndërsa “KosovoLove” kishte qenë reflektim mbi territoret gjeografike, politike e romantike ku një burrë dhe një grua kishin evokuar goditjet e luftës nëpërmjet dashurisë së qetë. Wilfrid Massamba kishte projektuar në ekranet e Festivalit zhanrin e muzikës rap si mënyrë efektive për të ndërgjegjësuar të rinj në rolin e ndërtimit të së ardhmes së tyre dhe të Kosovës nëpërmjet “Feelings from Kosovo”.
