Në esencë çdo pjesë e këngës është sinonim i delikatesës. Njerëzorja e mbinjerëzorja takohen në rrafshin e falënderimit. Prehja shpirtërore që ndihet nga tjetri cilësohet dhuratë, teksa këtë e ngre në mirënjohje ndaj jetës e krijuesit. Përveç lansimit të “Ra ni fjollë n’synin tem”, Petrit Çarkaxhiu shpalos edhe emërtimin e këngës më të re të grupit “Jericho”
Me tone të lehta të pianos, instrumentit me prejardhje nga Lindja e Mesme, balabanit e basit, krijohet një vijë e lehtë muzikore që ndjell njëfarë qetësie që në dëgjim të parë të këngës. Ndjesinë e shton edhe më shumë teksti, në autorësinë e këngëtarit.
Në pikëpyetjet e kuptimeve, meditimi është përgjigja që autori ia servon publikut nëpërmjet vargjeve. Petrit Çarkaxhiu si gjithmonë është fjalëpakë. I ndikuar nga letërsia e Rumit e bejtexhinjve përçon te audienca “lirikë muzikore”. Kjo dallohet më së miri te fjalët që përdor. “Nuri”, “sërri”, “Hakku”, “hedije”, Mexhnuni e Lejlaja janë disa nga to në këngën e cila gjeti realizim pas heqjes së pluhurit prej më shumë se 10 vjetësh prej kur është shkruar.
Në esencë, çdo pjesë e këngës është sinonim i delikatesës. Njerëzorja e mbinjerëzorja takohen në rrafshin e falënderimit. Prehja shpirtërore që ndihet nga tjetri cilësohet dhuratë, teksa këtë e ngre në mirënjohje ndaj jetës e Zotit.
Në intervistën e tij në emisionin “Express” në Kohavision të enjten, bashkë me regjisorin e videoklipit, Tanzhu Sylejman, ai jep detaje të këngës më të re, “Ra ni fjollë n’synin tem”. Mirëpo edhe zbulon projektin më të ri të grupit “Jericho”, e cila pritet të publikohet deri në muajin e ardhshëm nën emërtimin “Në garë për Qeveri”.
“Nuk është këngë që është nisur me një mesazh të caktuar, thjesht e ka një ndjesi. Kjo është e vjetër, ka goxha disa vjet që është kompozuar e shkruar. Është këngë e dashurisë, mirëpo edhe terminologjia që është përdorur (është e veçantë), sidomos sa i përket simbolikës edhe metaforave që janë përdorur në tekst”, thotë Çarkaxhiu, teksa pranon ndikimin që ka nga letërsia mistike dhe ajo e Lindjes së Mesme.
Emërtimin e këngës e ka ndërlidhur me njomësinë dhe delikatesën e fjollës, si shpërfaqje edhe e unikes njerëzore.
“Fjolla është vetvetiu delikate, një gjë që shumë shpejt shkrihet, por (kur shihet) në strukturat mikroskopike atëherë menjëherë njeriu mahnitet. Nëpër shumë dokumentare e video ku e paraqesin, çdo fjollë e ka formën origjinale e unike të veten. Në këtë pakufi të larmisë së fjollave, çdo njëra është unike në vete, ndoshta si çdo njëri prej nesh”, rrëfen solisti i bendit “Jericho” për këngën e cila kompletohet edhe nga Etibar Asadli në piano, Alafsar Rahimov (balaban) dhe Enver Muhamedi (oktet-kontrabas).
thotë se tashmë ka krijuar një standard të audiencës. “Për shkak që e kemi një bazë të fansave e cila qëndron besnike ndaj këngëve të cilat i bëj si solo artist, por edhe njëjtë me bend”, thotë ai. “Është tekst i vjetër, i ka mbi 10 vjet. Në atë kohë kam qenë më shumë i interesuar në poezinë e Rumit pse jo edhe të poetëve shqiptarë të fundit të shekullit 19 dhe fillimit të shekullit 20. Janë ata njerëz të cilët ma kanë prezantuar atë terminologji që e kam përdorur”, shprehet ai. “Jam munduar ta sjellim në formën e shqiptarizuar”.
Përqendrimi te mesazhi
Videoklipi është gati si çdo paraqitje e Çarkaxhiut. Minimal me pamje e me gërshetim të natyrës, duke ngritur fokusin më të madh te pjesa tekstuale dhe kuptimore, e jo veç vizuale.
“Ishim duke ndejë në ‘Rock Kuzhinë’ nga 11 e natës, edhe thamë: ‘Tanzhu a shkojmë e bëjmë një klip’. E nisim në 12 të natës, e mbaruam në 10 të mëngjesit xhirimet dhe pjesën më të madhe të montimit”, thotë Çarkaxhiu, teksa përmend që kanë përdorur disa pamje nga maja e Shkëlzenit e Kosharja, të cilat janë xhiruar disa vjet më herët.
Për regjisorin e videoklipit, Tanzhu Sylejman, bashkëpunimi me Çarkaxhiun është më interesant për shkak të lehtësisë së komunikimit dhe të shkëmbimit të ideve.
“Procesi i videoklipit me Petritin është më interesant se me të tjerët sepse Petriti qysh i servon këngët për fansat e vet, edhe neve për ekip na servon krejt materialin. Ne veç e interpretojmë atë servimin e këngës”, pranon Sylejman.
tij, komunikimi ndodh shumë natyrshëm dhe shumë shpesh pa nevojën e planifikimeve.
“Një moment interesant ke se deri e gjetëm fotografinë, të cilën s’e kemi fol më herët, po kur e gjetëm thamë: ‘Po kjo është referenca që e kemi lyp’. Edhe në spotet e kaluara na ka ndodhur që e kemi lyp një send pa e fol edhe kur e kemi gjetur kemi thënë po për këtë jemi munduar”, shprehet Sylejman, për të cilën vetë Çakaraxhiu thotë ia dinë shijen njëri-tjetrit.
Rikthimi i grupit “Jericho”
Kur pyetet për grupin “Jericho”, solisti thotë se ata së fundmi ishin duke u marrë me performanca virtuale përgjatë pandemisë. Publikut nuk i kanë sjellë më këngë që nga viti 2019, atëherë kur vargjet “Ëndërr e prerë” të Dritëro Agollit i patën jetësuar në formën e recitalit, ndërkaq pjesa tjetër tekstuale e shkruar nga vetë Çarkaxhiu jehonte me mesazhin e fuqisë përbashkuese.
Në emisionin “Express” ai shpalosi për projektin në ardhje të këtij grupi, të cilën pritet ta publikojnë eventualisht deri në muajin maj.
“Brenda muajit ose në maj do ta publikojmë një këngë e cila quhet ‘Në garë për Qeveri’, thotë ai duke treguar ekskluzivisht emërtimin e këngës për shikuesit e KTV-së. “Ka qenë këngë e paralajmëruar, e kemi përpunuar më shumë sa i përket miksit, editimit. Ka mbet pjesa e videoklipit me u realizu”.
Petrit Çarkaxhiu deri më tani i ka dhënë zë këngëve të grupit “Jericho” si “Kanga Jonë”, “Kanga e Ashikëve”, “Nëntor i ftohtë”, “Tomli i nanës”, “Albanin Rhapsody”, teksa së fundmi ka publikuar një varg solo – këngësh si “Drenushë e Trembur”, “Dul behari”, “Vajza e tokave të diellit” e “Natë e Gatë”.
