-
Përktheu:
Vita Abrashi-Kajtazi
- 22 maj 2025 12:54
- Shpërndaje në:
Disenjatorja, Victoria Beckham është shprehur se përpiqet çdo ditë të jetë nënë dhe bashkëshorte e mirë, pa pretenduar se është perfekte.
Në një intervistë për serinë në YouTube “Reviewed By Osa”, 51-vjeçarja, e cila ka katër fëmijë, me ish-futbollistin David Beckham, ka rrëfyer se pavarësisht angazhimeve si nënë punëtore dhe sipërmarrëse, prioriteti i saj është të jetë njeri i mirë, ka raportuar FemaleFirst.
“Do të doja të mendohej se jam nënë e mirë, grua e mirë. Përpiqem të jem më e mira që mundem. Punoj shumë. Dua të mendoj se jam person i sjellshëm. Jam shumë pozitive. E dua energjinë e mirë”, ka thënë ajo.
Ish-anëtarja e grupit “Spice Girls”, e cila tashmë është ikonë mode me brendin e saj të njohur ndërkombëtarisht, ka theksuar se nuk e ka pasur kurrë synim të jetë perfekte, por thjesht të japë më të mirën e saj.
“Nuk përpiqem të jem perfekte, nuk kam qenë kurrë perfekte. Thjesht dua të jem më e mira e mundshme. I pranoj të metat e mia. Gjithçka ka të bëjë me atë për ta nxjerrë më të mirën nga vetja. Këtë e bëj përmes një diete të shëndetshme, stërvitjes së përditshme dhe stilit të jetesës që më përfaqëson”, ka shtuar ajo.
Ylli ka cekur se përkushtimi ndaj vetes është pjesë e përkushtimit të saj ndaj familjes.
“Thjesht përpiqem të jem ‘unë’ në formën më të mirë, që të jem nëna më e mirë, bashkëshortja më e mirë dhe profesionistja më e mirë që mund të jem”, ka thënë ajo.
Beckham ka pranuar se ndonjëherë përballet me dyshime ndaj vetes, por i sheh ato si diçka që e mbajnë me këmbë në tokë.
“Kam dyshime për veten, por nuk lejoj që të më rëndojnë. Besoj se një element i tillë është gjithmonë i nevojshëm, sepse përndryshe, njeriu do të bëhej jashtëzakonisht arrogant. Unë jam mjaft e përulur si njeri”, ka thënë disenjatorja.
Në mars, çifti Beckham organizoi një festë të hershme për 50-vjetorin e Davidit në Miami, Florida.
“Çfarë mënyre për të nisur festimet për Davidin, të rrethuar nga miqtë dhe familja... Puthje nga Miami!”, pati shkruar Beckham në Instagram.
Megjithëse djali i madh, Brooklyn Beckham dhe gruaja e tij Nicola munguan në festë, David u shoqërua nga emra të njohur si Lionel Messi, Luis Suarez, Tom Brady, Justin Theroux dhe Fisher Stevens.
