Aktori 39-vjeçar, Tom Hiddleston, i cili në vitin 2016 u bë lajm në mediat botërore për lidhjen e tij me superyllin e muzikës pop, Taylor Swift, besohet se ka filluar të bashkëjetojë me të dashurën e tij të re, Zawe Ashton.
Dyshja e famshme duket të jetë në lidhje dashurie nga shkurti i vitit të kaluar, kur edhe filloi të spekulohet se Hiddleston dhe aktorja 35-vjeçare, Zawe Ashton, janë shndërruar në çiftin më të ri të showbizit, ransmeton Koha.
Tani, po spekulohet se ylli i filmave “Thor”, i ka kërkuar aktores dhe koleges së tij nga shfaqja “Betrayal”, që të shpërngulet në shtëpinë e tij në Atlanta, ku ai do të qëndrojë gjatë gjithë vitit 2020.
Aktori i famshëm britanik është duke punuar në një seri të re për platformën, Disney+, prandaj kohën e karantinës si pasojë e pandemisë së koronavirusit e ka kaluar në qytetin amerikan.
Çifti, po ashtu është parë disa herë së bashku në publik, teksa shëtisnin nëpër rrugët e Atlantas.
Një burim i afërt i aktori ka thënë për gazetën “The Sun”: “Tom dhe Zawe, kanë qëndruar të heshtur rreth lidhje së tyre por ajo i ka kaluar javët e fundit me të në Shtetet e Bashkuara të Amerikës. Ata përshtaten shumë mirë me njëri-tjetrin dhe po e shijojnë jetën e qetë, larg vëmendjes së mediave dhe publikut si dhe glamurit që e shoqëron botën e showbizit. Jetët e tyre janë shumë të angazhuara me projekte, prandaj është shumë e rëndësishme për ta si çift, që të kalojnë sa më shumë kohë në privatësi.”
Dyshja është takuar gjatë realizimit të shfaqjes së Harold Pinterit, “Betrayal”, ku ata e kanë portretizuar një çift, martesa e të cilëve shkatërrohet si pasojë e aferës së bashkëshortes, me mikun e ngushtë të burrit të saj.
Në të kaluarën disa burime të afërta të Hiddlestonit, kishin treguar se ai është traumatizuar nga lidhja e tij e kaluar me, Taylor Swiftin, dhe vëmendja e madhe që e kishin marrë në publik. Nga atëherë, aktori është bërë paksa i fiksuar kur vjen punë tek ruajtja e privatësisë së tij, prandaj edhe ka zgjedhur të jetë shumë diskret me të dashurën e re. Por, aktori mendon që Zawe mund të jetë dashuria e tij e jetës, dhe është gati ta krijojë një lidhje më serioze me aktoren.
