Filmi i ardhshëm i Netflixit, “Project Power”, ka disa vjet që është në realizim e sipër, por pritja për ta parë filmin e zhanrit aksion dhe fantastiko-shkencor është pothuajse gati.
Platforma e njohur digjitale e ka publikuar trilerin e parë të filmit, i cili do të fillojë së transmetuari për publikun e gjerë nga 14 gushti i këtij viti, transmeton Koha.
“Project Power” zë vend në një botë imagjinare, ku një drogë e veçantë u jep njerëzve të zakonshëm aftësi mbinatyrore për vetëm pesë minuta. Një baba, i portretizuar në film nga Jamie Foxx, duhet të shpëtojë vajzën e tij nga prodhuesit e këqij të kësaj droge, derisa në misionin e tij ndihmohet edhe nga disa aleatë të papritur.
Në film krahas yllit hollywoodian luajnë edhe aktorët: Joseph Gordon-Levitt, i cili vjen në rolin e një detektivi që e ndihmon personazhin e Foxxit, Dominique Fishback, Machine Gun Kelly, Rodrigo Santoro, Amy Landecker dhe Allen Maldonado.
Filmi “Project Power” e shënon hapin e parë të rëndësishëm për dyshen e regjisorëve, Ariel Schulman dhe Henry Joost, si dhe është projekti i tyre më i madh deri më tani. Në të kaluarën ata së bashku e kishin bërë regjinë e filmave të tillë si: “Catfish”, “Viral”, “Nerve”, “Paranormal Activity 3” dhe “Paranormal Activity 4”.
Sa u përket yjeve të Hollywoodit, Foxx dhe Gordon-Levitt, që të dy aktorët kanë luajtur në disa filma të mëdhenj gjatë këtyre vjetëve të fundit.
Edhe
Will Smith mezi po pret ta shohë projektin filmik të Jamie Foxxit
Foxx së fundi ka luajtur në projektet “Just Mercy”, “Robin Hood” dhe “Baby Driver”, derisa Gordon-Levitt ka luajtur në filmat “Snowden”, “7500”, “Star Wars: The Last Jedi” dhe “Knives Out.”
Derisa situata e fundit e shkaktuar nga pandemia e koronavirusit e ka penguar punën rreth disa filmave dhe serive të njohura televizive, kompania “Netflix” ka vazhduar të lansojë projekte të reja edhe gjatë kohës së karantinës.
Platforma e njohur digjitale së fundmi i ka sjellë publikut tre filma me buxhet të lartë si: “Extraction” me protagonist aktorin australian Chris Hemsworth, “The Last Days of American Crime” dhe “The Old Guard”, ku në rolin kryesor luan ylli i listës A në Hollywood, Charlize Theron.
