Cara Delevingne rrëfen betejën me varësinë nga droga

Modelja dhe aktorja britanike Cara Delevingne ka folur hapur për problemet e saj me drogën dhe vështirësitë emocionale që e penguan të niste më herët karrierën muzikore.

34-vjeçarja ka treguar se, në periudhën kur nuk ishte e shkëputur nga përdorimi i substancave, e kishte të vështirë të përballonte kritikat dhe gjykimet e të tjerëve.

“Nuk isha e kthjellët dhe ndihesha krejtësisht e paqëndrueshme. Isha në prag të urrejtjes ndaj vetes, ndaj nuk do të kisha mundur të përballoja kritikat për muzikën time”, u shpreh ajo në një intervistë për revistën Bustle.

Delevingne ka shpjeguar se dikur mund të përballonte komentet për pamjen e saj apo aftësitë si aktore, por kritikat për muzikën do të kishin qenë shumë më të vështira për të.

Në albumin e saj debutues, “Not Normal”, të publikuar në muajin shtator, Delevingne ka bashkëpunuar me këngëtaren dhe kantautoren Fiona Apple, të cilën e konsideron një frymëzim të madh personal dhe artistik.

Ajo ka kujtuar edhe mënyrën e veçantë se si punuan për këngën “Need It”, duke shkëmbyer fotografi të shënimeve të shkruara në letra ngjitëse.

“Ajo ka qenë një frymëzim për mua, si njeri dhe si artiste. E adhuroj pa masë”, ka thënë Cara për Fiona Apple.

Në një intervistë të mëparshme për revistën ELLE, artistja ka folur edhe për mënyrën se si përpiqej të mpinte emocionet gjatë viteve të saj më të vështira.

“Për një kohë mjaft të gjatë u përpoqa t’i mpija ndjenjat dhe, në përgjithësi, ndihesha e mpirë emocionalisht”, ka treguar ajo.

Cara ka shtuar se sot ndihet më e hapur ndaj jetës dhe më mirënjohëse për atë që ka arritur.