Këngëtarja e re në skenën muzikore, Dove Cameron, arriti të bëhet pjesë e toplistës së 100 këngëve më të mira “Billboard” me hitin “Boyfriend”, por siç duket, kënga pati gjasa të përfundojë duke mos u publikuar kurrë.
Ylli i projekteve të “Disney Channel” u shfaq në një intervistë për emisionin “The Tonight Show Starring Jimmy Fallon”, ku zbuloi se pas incizimit të saj, kjo këngë nuk iu duk edhe aq e bukur apo e rëndësishme.
Sipas Cameronit, “Boyfriend” ishte rezultat i nxitjes nga labeli i saj për të realizuar muzikë të re.
“Unë sapo e kisha përfunduar një turne të vogël nëpër skena të teatrove, ku takohesha me fansat e mi, shëtisja nëpër qytete të ndryshme dhe po mundohesha ta kuptoja se çfarë do të thotë të performosh live. Por, udhëheqësit e labelit më kërkuan që menjëherë ta filloja punën rreth albumit. Prandaj u futëm menjëherë në studio dhe për dy orë e shkruam këngën ‘Boyfriend’ dhe e incizuam atë për 20 minuta. Në fillim nuk më pëlqente shumë por, megjithatë, vendosëm ta publikonim. Nuk mendoja se do të pëlqehej nga publiku, por doli të jetë projekti i cili befas ma dhuroi këtë karrierë të dytë”.
Kënga “Boyfriend” gëzoi suksese të jashtëzakonshme në toplistat muzikore gjatë vitit 2022, dhe qëndroi për plot 24 javë në “Billboard Hot 100”.
E sa u takon planeve të ardhshme të këngëtares dhe aktores, ajo i përditësoi fansat dhe tregoi se është duke punuar shumë rreth albumit debutues. Po ashtu zbuloi se i ka shkruar afërsisht 100 këngë të reja dhe se projekti i radhës do të vijë në bashkëpunim me producentin dhe DJ Diplo.
© KOHA.
