Filmi biografik i Madonnas ka dështuar.
Ylli i hitit “Vogue” kishte kohë të gjatë që po planifikonte që ta bëjë regjinë e filmit, ku rolin protagonist pritej ta luante aktorja e serialit “Ozark”, Julia Garner, por projekti është pezulluar deri në kohë të pacaktuar, derisa këngëtarja 64-vjeçare do të fokusohet më shumë në turneun e ri botëror.
Disa burime kanë deklaruar për revistën “Variety” se, Madonna vazhdon të jetë e përkushtuar në realizimin e filmit që flet për jetën e saj, por tani ky projekt nuk është duke u zhvilluar në studion “Universal Pictures”.
Madonna – e cila në të kaluarën e ka bërë regjinë e filmave “Filth and Wisdom” dhe “W.E.” – shpjegoi vitin e kaluar se ka vendosur ta realizojë vet këtë biografi, me qëllim që t’i ndalojë “burrat mizogjenë” që ta marrin përsipër projektin. Siç u bë e ditur në vitin 2020, këngëtarja e ka bashkëshkruar dhe do e bëjë regjinë e tij. Filmi i cili do t’i dërgojë fansat në një rrugëtim emocionues të karrierës së jashtëzakonshme të këngëtares në këto pesë dekada, aktualisht nuk ka ndonjë titull.
“Unë e kam pasur një jetë të jashtëzakonshme, prandaj duhet ta realizoj një film të jashtëzakonshëm. Po ashtu ishte një goditje parandaluese sepse shumë njerëz po përpiqeshin të bënin filma për mua. Kryesisht burra mizogjenë. Kështu që ngula këmbë dhe u thashë që askush nuk do ta tregojë historinë time, përveç meje. Dua ta sjell në ekran rrugëtimin e jashtëzakonshëm në të cilin më ka dërguar jeta si artiste, muzikante, valltare dhe si një person duke u përpjekur t’i hapë rrugët e saj në këtë botë. Fokusi i filmit gjithmonë do të jetë muzika. Muzika më ka mbajtur aktive dhe arti më ka mbajtur të gjallë. Kam aq shumë tregime të parrëfyera më parë dhe tejet inspiruese, prandaj kush është më i përshtatshëm për t’i treguar ato sesa unë. Është shumë e rëndësishme t’i ndajë me publikun dhe fansat kujtimet e mira dhe të këqija të jetës sime, përmes zërit dhe vizionit tim.”
Ylli i hitit “Frozen” po ashtu e ka pranuar se nuk ishte e lehtë ta vë veten në qendër të vëmendjes për këtë projekt.
Madonna shquhet si mbretëresha e muzikës pop dhe prapa vetes bartë një numër të madh të hiteve. Disa prej këngëve të saja më të pëlqyera nga publiku mbarë botëror janë: “La Isla Bonita”, “Material Girl”, “Like a Prayer”, “Vogue”, “Music”, “Ray of Light”, “Sorry” dhe të tjerë.
Për nderë të 40-vjetorit të këngës së saj të famshme “Holiday”, këngëtarja ka vendosur ta realizoj turneun e parë të hiteve më të mira ndonjëherë. Mbretëresha e popit do të performojë muzikë nga e gjithë karriera e saj, nga albumi debutues i vitit 1983, e deri në “Madame X” të 2019-s.
© KOHA. Të gjitha të drejtat janë të rezervuara.
