Lohan nuk e dëshiron vëmendjen që vjen me rikthimin e saj në film
Aktorja 36-vjeçare, Lindsay Lohan, e cila e gëzon një karrierë të pasur kinematografike me role në filma të tillë si, “Freaky Friday” dhe “Mean Girls”, por të shoqëruar edhe me disa probleme e skandale në jetën private, më në fund po e shënon rikthimin zyrtar në industri me lansimin e projektit të saj të ri, Falling For Christmas”.
Pas një pauze disa vjeçare në botën e showbizit, Lohan thotë se ka vendosur që rikthimin ta shënojë me një projekt romantik të Netflixit, ngase dëshiron ta shmangë vëmendjen dhe presionin që vjen me daljen në ekran të madh.
“Doja të bëja diçka që i bënë njerëzit të mendojnë se nuk jam larguar kurrë nga ekrani. E dini, shumë njerëz e quajnë këtë një rikthim timin në Hollywood dhe kjo i sjell shumë presion dhe stres gjithë kësaj situate. Unë nuk jam person që e dëshiron këtë lloj vëmendje në jetën time. Nuk jam një aktore që mendoj për filmat që kam bërë dhe sa e aftë jam në këtë industri”, deklaroi Lohan në një intervistë të fundit.
Ylli i filmit “The Parent Trap”, e cila karrierën e ka filluar si fëmijë duke luajtur në filma të suksesshëm në arkat filmike, dhjetë vjet më parë vendosi të largohet nga industria për shkak të arsyeve personale. Problemet me të cilat ajo po përballej në jetën reale filluan t’i shkaktojnë dëme edhe në jetën profesionale, por tani aktorja thotë se po e shijon rutinën e punës në sheshin e xhirimeve.
Me rikthimin në film, fansat e Lohanit nga fusha e muzikës kanë filluar të entuziazmohen me shpresë që pas 17 vjetësh, prej kur e lansoi albumin e saj të fundit “A Little More Personal”, ajo do të sjellë muzikë të re së shpejti.
Lindsay e kishte paralajmëruar një rikthim potencial në muzikë në vitin 2020, me publikimin e këngës “Back to Me”, por në intervistën e re për revistën “Who What Wear” deklaroi se njëherë nuk po ngutet ta ndërmarrë këtë hap.
“Nëse dëgjoni muzikë nga unë, shpresoj se do të jetë në një film muzikor. Unë i kam incizuar shumë këngë të reja që po qëndrojnë aty, duke pritur. Ndoshta pesë vjet më vonë, do ta bëj një album tjetër”, shtoi tutje Lohan.
Sa i përket zhvillimit të jetës larg vëmendjes së publikut në këto vjetët e fundit, gjatë së cilës kohë Lohan edhe u martua me biznesmenin Bader Shammas, ajo thotë se kjo ishte një eksperiencë që i ka shërbyer pozitivisht në jetë.
“Sa herë që e ngadalëson ritmin e jetës, e kupton se ekzistojnë shumë gjëra të vogla që mund të të bëjnë të lumtur në një mënyrë tjetër”.
Pas zhvendosjes në Dubai në vitin 2014, ku paparazët janë ilegalë, aktorja tha se e gjeti veten në një vend të shenjtë për të, çka ia lejoi të jetë vetvetja dhe të mos bezdisej nga askush.
Filmi “Falling for Christmas” është në dispozicionin e publikut përmes platformës Netflix.
