Ylli i muzikës pop, Britney Spears, e shfrytëzoi rrjetin social Instagram për ta shprehur mirënjohjen për suksesin e këngës së saj të fundit, “Hold Me Closer”.
Me këtë rast ajo e falënderoi muzikantin britanik, Elton John, që i dha vetëbesim për ta realizuar duetin e tyre të shndërruar në hit.
Këngëtarja e njohur amerikane me mesazhin e saj e postoi edhe një fotografi, ku shihet duke pozuar mbi pianon e Eltonit, të cilin e falënderoi për faktin se i ka besuar për ta realizuar një këngë kaq ‘cool’.
“Faleminderit Elton John që më dhe vetëbesim dhe besove në mua për realizimin e një kënge kaq cool. ‘Hold Me Closer’ u rendit në top-dhjetëshen e toplistës ‘Billboard’, dhe në vendin e parë të platformës muzikore iTunes”.
Me kombinimin e elementeve të hiteve të kaluara të Johnit, “Tiny Dancer” dhe “The One”, kënga e re e dyshes së famshme e cila karakterizohet nga tingujt e zhanrit dance, debutoi në pozitën e gjashtë të toplistës së 100 këngëve më të mira në Amerikë. Falë këtij suksesi, “Hold Me Closer” e shënon pozicionimin më të mirë të Spearsit në “Billboard”, nga viti 2012 kur e publikoi bashkëpunimin e saj me will.i.am, “Scream and Shout”.
Vetëm javën e kaluar, Spears dhe John, e publikuan remixin e parë zyrtar të “Hold Me Closer”, i cili vjen i ripërpunuar nga DJ dhe producenti britanik, Joel Corry.
© KOHA. Të gjitha të drejtat janë të rezervuara.
