Reperi A$AP Rocky u deklarua i pafajshëm të mërkurën në Los Anxhelos, në akuzat se ka qëlluar me armë zjarri një ish-mik dhe partner të muzikës gjatë një debati.
I dashuri i superyllit të muzikës, Rihanna dhe babai i djalit të saj tre muajsh, është i akuzuar për dy vepra penale për sulm me një armë zjarri gjysmë automatike, raportoi Daily Mail të mërkurën.
Rocky - emri i vërtetë i të cilit është Rakim Mayers, mund të përballet me deri në katër vjet burgim për secilën akuzë nëse dënohet.
Në seancën e së mërkurës, artisti 33-vjeçar i muzikës hip-hop u shfaq me kostum blu të errët dhe kravatë, me flokët e tij të gërshetuar dhe i rrethuar nga disa artistë me kostume të errëta.
Kur gjyqtarja Victoria Wilson e pyeti Mayersin se si donte të deklarohej, avokatja e tij, Sara Caplan, tha se ai deklarohet i pafajshëm për të dyja akuzat.
Të hënën, zyra e Prokurorit të Qarkut të Los Anxhelosit e ngarkoi reperin me dy akuza.
Ai gjithashtu dyshohet se ka qëlluar me armë zjarri në drejtim të viktimës në një konfrontim të mëpasshëm.
