“House of Hammer” sjell rrëfimet e viktimave të supozuara të aktorit Armie Hammer
Foto: Discovery+
Ish të dashurat, viktimat e supozuara dhe anëtarët e familjes së, Armie Hammerit, shihen duke folur kundër aktorit në një trailer të ri të serisë së dokumentarëve, “House of Hammer”, që do të transmetohet në Discovery+.
Klipi tre minutësh i projektit të ardhshëm, fokusohet në akuzat e ngritura kundër aktori për sulm seksual, fantazi kanibalizmi, kërcënime dhe të tjerë, raporton “The Hollywood Reporter”.
“Jam këtu të flas për atë që ka ndodhur në lidhjen time me Armie Hammer. Në fillim ndihesha sikur gjithçka ishte e përkryer”, dëgjohet duke thënë ish e dashura e aktorit, Courtney Vucekovich. Por gjërat kishin ndryshuar shpejtë për të, njësoj siç kishte ndodhur edhe me ish të dashurën tjetër të Hammerit, Julia Morrison. Kjo e fundit shpjegon se si aktori i kishte kërkuar të kryente marrëdhënie me njerëz të panjohur, për t’ia vërtetuar dashurinë dhe përkushtimin ndaj tij.
Pamjet e para të dokumentarit gjithashtu lënë të kuptohet se, Hammer, e kishte shprehi t’i vërshonte gratë me komplimente, duke ju thënë se ato ishin të përkryera për të, përpara se t’i shtynte të bënin gjëra të papranueshme dhe shpesh të çuditshme.
Courtney Vucekovich ishte gruaja e parë që e akuzoi aktorin publikisht, dhe pas saj u lajmëruan edhe dhjetëra gra të tjera të cilat zbuluan se për vite të tëra ishin abuzuar nga Hammer.
Dokumentari tri pjesësh, përfshin gjithashtu intervista ekskluzive me tezen e aktorit, Kejsi Hammer, e cila thotë se dhuna dhe abuzimi ishin prezent në familjen e tyre me breza të tërë.
“House of Hammer” fillon së transmetuari në Discovery+ më 2 shtator të këtij viti.
