Këngëtari i shumëshpërblyer, Harry Styles, e ka paralajmëruar një koncert special të titulluar, “One Night Only In New York”, i cili ka për qëllim ta festojë lansimin e albumit të tij të ri muzikor, “Harry’s House”, raportoi të martën portali “NME”.
Ylli britanik i muzikës pop e lanson albumin e tretë të incizuar në studio, më 20 maj. Pjesë e tij është edhe kënga e sapo, “As It Was”.
Koncerti special do të mbahet në arenën “UBS” në Long Island. Sipas një deklarate për media, shou do ta shënojë herën e parë që Harry i interpreton ‘live’ këngët e albumit të ardhshëm.
Për shkak të numrit të kufizuar të biletave në dispozicion, kompania “Ticketmaster” ka konfirmuar se nuk do të ketë shitje të përgjithshme për biletave.
Styles së fundmi i performoi dy këngë të albumit “Harry’s House”, gjatë performancës së tij në festivalin “Coachella”. Në fundjavën e parë të festivalit, këngëtari i interpretoi këngët, “Boyfriends” dhe ‘Late Night Talking”.
Ndërkohë, të hënën (2 ma) u publikua traileri i parë i filmit të ardhshëm, “Don’t Worry Darling”, i cili e shënon rolin e parë protagonist të Stylesit. Trilei psikologjik vjen me regji të aktore së shndërruar në regjisore, Olivia Wilde, e cila njëkohësisht është e dashura e këngëtarit dhe aktorit britanik.
Filmi e rrëfen historinë e çiftit të martuar, Jack dhe Alice, të portretizuar nga Harry Styles dhe Florence Pugh. Ata jetojnë në një bashkësi utopike eksperimentale të quajtur “Victory”. Por, ndërsa të gjithë të tjerët në lagje duken të kënaqur dhe e pranojnë jetën e tyre në këtë komunitet, Alice fillon të ketë dyshime në qëllimin e tyre.
Në film po ashtu luajnë yjet e hollywoodit, Chris Pine, Gemma Chan, KiKi Layne, Nick Kroll dhe të tjerë.
“Don’t Worry Darling” lansohet nëpër kinema më 23 shtator 2022.
