Një premierë glamuroze e filmit “The Batman” zuri vend në Londër
Foto: AP/Associated Press
Robert Pattinson dhe Zoë Kravitz parakaluan mbi qilimin e kuq të shtruar në Londër, me rastin e premierës së filmit të tyre të fundit me superheronj, “The Batman”.
Aktori i njohur britanik, Pattinson para gazetarëve të pranishëm tha se ende nuk po e beson që po e shfaq filmin për gjithë adhuruesit në Londër, si dhe tregoi sa i vështirë doli të jetë ky rol për të.
“Një kënaqësi e vërtetë, veçanërisht për faktin se jemi këtu në Londër. Për mua kjo është gjithmonë një ndjenjë emocionuese dhe paksa sureale. Shfaqja e këtij projekti në Londër dhe të shohësh se si njerëzit gëzohen për filmin, nuk e kisha imagjinuar kurrë se kjo do të më ndodhte”.
Tutje, aktori e pranoi se Batmani është një hero i veçantë dhe kjo e ka ndihmuar atë paksa.
“Po, ti merr shumë fuqi vetëm nga ikonografia dhe ndonjëherë thjeshtë mund të qëndrosh në një skenë, dhe vet kostumi flet shumë për personazhin. Por megjithëkëtë është e vështirë të aktrosh me maskë në fytyrë. Fatmirësisht e kishim një drejtor fotografie të mrekullueshëm, Greig Fraser, i cili pas rreth dy javësh të eksperimentimit e kuptoi se si ta bënte filmin të funksionojë në mënyrë të përkryer”.
Kurse, Kravitz tha se puna në këtë projekt ishte një eksperiencë jo e zakonshme për të. Tutje, aktorja e cila e portretizon heroinën Catwoman, tregoi se çfarë e lidh atë në jetën e përditshme me macet.
“Unë e identifikoj veten me macet. Natyrisht, njerëzit më kanë pyetur vazhdimisht nëpër premiera nëse jam adhuruese e maceve, dhe e vërteta është se unë më shumë i dua qentë sepse është më lehtë t’i trajnosh ata. Por, për nga ana e karakterit identifikohem me macet. Sepse kurrë nuk mund ta dish se çfarë janë duke menduar ato. Macet e dinë çfarë duan dhe janë shumë të pavarura”.
Pattinson dhe Kravitz në premierë shoqëroheshin edhe nga pjesëtarët tjerë të ekipit të filmit, si regjisori Matt Reeves dhe aktorët Paul Dano, Jeffrey Wright dhe Andy Serkis.
“Ai thjeshtë është një aktor i mrekullueshëm. Por, e vërteta është se, pasi që i përfundoi filmat ‘Twilight’ dhe u shndërrua në një ikonë të pop kulturës, ai vazhdoi tutje duke luajtur në disa filma interesant të pavarur, duke punuar me regjisorë vërtetë të mahnitshëm. Dhe kështu u shndërrua në një aktor të jashtëzakonshëm dhe një kameleon i vërtetë. Dua të them, ai është ndryshe në secilin film që luan. Kur po e shkruaja skenarin e filmit ‘Good Tome’, e pash talentin e tij. Në film ai është një burrë shumë i përkushtuar, i fortë dhe i rrezikshëm, por në të njëjtën kohë i ndjeshëm dhe shumë seksi. Dhe në atë moment thash me vete, ‘Ky është një Batman i ri, dhe do të ishte shumë cool ta shihja në këtë rol’. Kështu që fillova ta shkruaja këtë film për të, pa e ditur fare nëse do të dëshironte të kthehej tek filmat me buxhet të lartë. Por, fatmirësisht ai e pëlqen Batmanin po aq sa edhe unë”, deklaroi regjisori.
“U mahnita nga filmi, nga skena e hapjes, muzikë, gjithçka. Pastaj sekuenca e dytë kur në prapavijë dëgjohet zëri i Robertit dhe qyteti Gotham, të gjitha këto duken mahnitëse në ekran. Ta shikoja veten nuk ishte edhe aq e lehtë, por filmi në përgjithësi m’u duk i jashtëzakonshëm, prandaj jam e lumtur ta ndajë këtë projekt me publikun”, tha para gazetarëve të pranishëm aktori, Paul Dano .
Kurse, aktori tjetër Andy Serkis deklaroi: “Unë kam qenë pjesë e disa filmave me buxhet të lartë, por ky është një projekt i jashtëzakonshëm. Dhe e mira e kësaj eksperience është ribashkimi me Matt Reevesin me të cilin kam punuar në filmat ‘Apes’. Por, pastaj mundësia për të bashkëpunuar për së afërmi me Robert Pattinsonin, ishte një kënaqësi e vërtetë. Ai është një aktor fenomenal të cilin e kam adhuruar nga filmat ‘Twilight’, dhe pastaj ishte një mrekulli ta shihja çfarë zgjedhje interesante dhe të ndryshme i bënte duke u përfshirë në filma të pavarur. Prandaj, kur Matt vendosi ta angazhojë atë në rolin e Batmanit, u gëzova shumë sepse e dija se do ta studionte thellë këtë personazh dhe do ta sillte një performancë shumë interesante”.
Ylli britanik 35-vjeçar, Robert Pattinson, e portretizon superheroin e dashur për publikun në filmin e ardhshëm “The Batman”, dhe së fundmi ai u premtoi fansave se do ta shohin një anë të errët të këtij personazhi ani pse ai vazhdon ta ndjekë kodin i cili nuk e lejon të kryej vrasje.
Krahas yjeve Pattinson, Kravitz, Dano Serkis, në film luajnë edhe aktorët: Colin Farrell, Jeffrey Wright, John Turturro dhe Peter Sarsgaard.
“The Batman” i cili vjen i realizuar me një buxhet prej 100 milionë dollarësh, lansohet nëpër kinematë botërore nga 4 marsi.
