Është shtyrë për herë të katër data e seancës gjyqësore në rastin e këngëtarit të famshëm amerikan, R. Kelly.
Ylli 47-vjeçar i muzikës R&B, i cili po pret të dal para gjyqit në New York, për t’u përballur me akuzat e ngritura ndaj tij për trafikim seksual dhe mashtrim, do të duhet të pres deri më 9 gusht pasi seanca gjyqësore është shtyrë për disa muaj, si rezultat i pandemisë së koronavirusit.
Gjykatësja federale e Brooklynit, Ann Donnelly citohet të ketë thënë: “Ne e kemi një seancë të planifikuar për muajin prill, por besoj se nuk do të befasoheni për faktin se kjo datë nuk qëndron më për shkak të situatës aktuale me pandeminë”.
Gjykatësja dha plot arsye pse gjykimi ndaj këngëtarit duhet shtyrë, përfshirë këtu faktin se anëtarët e jurisë do të detyroheshin të udhëtojnë përmes transportit publik për të shkuar në gjykatë, si dhe R. Kelly do të duhej të zhvendosej në burgun e Brooklynit ku aktualisht ka shpërthim të rasteve me COVID-19.
Ylli i hitit “I Believe I Can Fly” ka bërë disa herë kërkesë për lirim nga burgu, duke kërkuar të vazhdojë ta pres gjykimin në lirim me kusht, me arsyetimin se ka frikë nga shpërthimi i koronavirusit në burgun ku ai po qëndron, në mesin e shumë arsyeve tjera. Por secilën herë, kërkesa e tij është refuzuar.
© KOHA. Të gjitha të drejtat janë të rezervuara.
