Këngëtarja britanike FKA Twigs ka ngritur padi kundër aktorit, Shia LaBeouf, të cilin e akuzon për abuzim fizik dhe emocional gjatë lidhjes së tyre një vjeçare.
Padia e ngritur në gjykatën e lartë të Los Angelesit, kërkon dëmshpërblim për dëmet e shkaktuara nga aktori, i cili besohet se e ka sulmuar atë seksualisht dhe i ka shkaktuar shqetësim emocional. Padia është ngritur në emër të këngëtares Tahliah Barnett, e njohur me emrin skenik FKA Twigs.
Zëdhënësit e aktorit 34-vjeçar, LaBeouf, që u bë i famshëm duke luajtur nëpër filma qysh në fëmijëri dhe i cili ishte në lidhje me muzikanten nga viti 2018 deri më 2019, nuk kanë pranuar të komentojnë rreth këtij rasti.
Ndërkaq, ylli i kinematografisë përmes një deklarate të postuar në “New York Times”, citohet të ketë thënë: “Nuk jam në gjendje t’i tregoj dikujt se si e ka bërë të ndihet sjellja ime. Nuk kam justifikime për agresivitetin që e kam shfaqur nën ndikim të alkoolit, por thjeshtë shpjegim të arsyeshëm. Unë kam qenë abuziv ndaj vetes dhe personave që më kanë rrethuar për vjet të tëra. Madje disa herë i kam bërë keq më së shumti njerëzve të mi të afërt. Më vjen turp nga e kaluara ime dhe i kërkojë falje të gjithë atyre që i kam lënduar. Nuk kam çfarë të them tjetër për këtë gjë”.
Barnett ishte takuar me LaBeoufin gjatë xhirimeve të filmit gjysmëbiografik të vitit 2019, “Honey Boy”, i cili i ekranizoi vitet e hershme dhe problematike të aktorit të ri.
LaBeouf akuzohet se e ka nënçmuar vazhdimisht të dashurën e tij atëkohë, duke iu drejtuar me fjalë ofenduese. Në një rast thuhet se aktori e ka përplasur këngëtaren për veture dhe ka provuar ta ngufatë atë. FKA Twigs po ashtu thotë se aktori disa herë, me vetëdije të plotë i ka bartur sëmundje seksuale.
Avokati i Tahliah Barnett në një prononcim për media ka thënë se këngëtarja ka dashur që këtë çështje ta zgjidh në formë private, me kushtin që aktori të pranonte t’i nënshtrohej trajtimit kuptimplotë dhe të qëndrueshëm psikologjik. Por meqë LaBeouf nuk ka dashur t’i pranojë këto kushte dhe të kërkojë ndihmë profesionale, FKA Twigs është detyruar të ngrit padi gjyqësore, në mënyrë që t’i parandalojë gratë e tjera të vuajnë abuzime të ngjashme nga ai.
Edhe këngëtarja Sia i ka dalë në krah Barnettit dukë thënë se Shia LaBeouf është një gënjeshtar patologjik i cili e ka mashtruar atë, duke i thënë se është beqar dhe kështu e ka bërë këngëtaren pjesë të tradhtisë së tij.
Përmes një postimi në Twitter, Sia ka deklaruar: “Edhe unë jam lënduar emocionalisht nga Shia, një gënjeshtar patologjik i cili më mashtroi të hyjë në një lidhje dashurie me të duke deklaruar se është beqar. Unë besoj se ai është një burrë shumë i sëmurë dhe më dhimbset ai dhe gjithë viktimat e mashtrimeve të tij. Prandaj, nëse e doni veten, jini të sigurt dhe qëndroni sa më larg tij”.
LaBeouf ishte protagonist i videoklipit të këngëtares australiane “Elastic Heart” i publikuar në vitin 2015, gjatë së cilës kohë aktori ishte në lidhje dashurie me Mia Gothin. Atëkohë, Sia ishte e martuar me regjisorin e dokumentarëve Erik Anders Lang. Këngëtarja kishte bërë kërkesë për shkurorëzim në dhjetor të vitit 2016, pas dy vjetësh martesë.
Shia LaBeouf u bë i famshëm si aktor i filmit “Even Stevens”, në kanalin për fëmijë dhe të rinj “Disney”, dhe më vonë luajti në projekte të mëdha hollywoodiane si: “Transformers” dhe “Indiana Jones and the Kingdom of the Crystal Skull”.
Në dekadën e fundit aktori ka hasur në disa probleme me ligjin për sjellje të çrregullt, ngasje të veturës në gjendje të dehur dhe probleme me zemërimin. LaBeouf ishte trajtuar për varësinë nga alkooli në vitin 2014 dhe 2017.
© KOHA. Të gjitha të drejtat janë të rezervuara.
