Zack Snyder dhe Jay Oliva do t’i bashkojnë forcat me “Netflixin” për ta krijuar një seri të re origjinale të animuar (anime) për shërbimin më të popullarizuar për streaming. Projekti, i vendosur në botën e mitologjisë nordike, vjen në vazhdën e përpjekjeve të “Netflixit” për ta përforcuar ofertën në fushën e serive anime.
Snyder dhe Oliva së bashku do ta shkruajnë një skenar dhe do ta bëjnë produksionin e serisë. Oliva gjithashtu do ta ketë rolin e showrunnerit dhe regjisorit.
Snyder dhe Oliva tashmë shumë herë kanë bashkëpunuar si producentë dhe atë në filmat Justice League, Batman v Superman, 300: Rise of an Empire dhe Man of Steel, shkruan KOHA Ditore.
"Inovacioni i Zack Snyder në tregimin vizual e ka inkurajuar industrinë që ta bëjë një hap më shumë dhe e ka shndërruar atë në një nga regjisorët më të njohur të gjeneratës së tij. Jemi më shumë se të ngazëllyer që do të bashkëpunojmë me të dhe ekipin e tij të shkëlqyer për t’i sjellë në jetë personazhet e kultit dhe tregimet nga mitologjia nordike, në stilin e tij unik", tha John Derderian, udhëheqës i programit anime për “Netflix”.
Ende nuk dihet se kur planifikohet projekti.
-
15 korrik 2019 17:59
-
Shpërndaje në: