Arbëri

“Xhorxh Bush”- sërish vend feste, bllokon komunikacionin

Kështu i mbushur me njerëz duket sheshi ‘Xhorxh Bush’, (PAMJE), sa herë që komuna vendosë të ndalojë qarkullimin e autobusëve dhe taksive, për ndonjë aktivitet.

E që nga ardhja e pranverës, aktivitete të shpeshta po organizohen në këtë shesh, si ky për 1 Qershorin ditën ndërkombëtare të fëmijëve.

Ndonëse aktivitetet po u pëlqejnë qytetarëve, Sofije Sllovinja thotë që mbyllja e Xhorxh Bush-it për transport, po shkakton tollovi.

“Më mirë kishte me qenë mos të mbyllet fare rruga te sheshi ‘Xhorxh Bush’, për shkak që mund të ndodhë ndonjë urgjencë dhe nuk mund të kalohet pastaj, është më shkurt të kalohet andej. Unë po e kuptoj që është një Qershori dita ndërkombëtare e fëmijëve, mirëpo nuk është në rregull të mbyllet kështu tërësisht. Besoj që vetëm ky sheshi ku gjendemi tani do të kishte mjaftuar”, thekson Sllovinja.

E për dikën tjetër mbyllja e rrugëve në kryeqytet u shndërrua tanimë në rutinë.

“Mbylljen e rrugëve veç e kanë bërë rutinë tanimë. Kjo po shkakton tollovi në komunikacion, mirëpo edhe ato mund të menaxhohen, duke e bërë një orar për autobusë. Përndryshe aktiviteti po më pëlqen shumë, u kënaqen fëmijët sot, atmosfera shumë e mirë”, deklaron qytetari Bahri Muçolli.

E dikush mendon që më mirë do të ishte të organizohej në shesh.

“Më mirë do ishte këtu të organizohej sepse kalojnë vetëm këmbësorët dhe jo në ‘Xhorxh Bush’. Ne këtu po mund ta shohim komplet sepse nuk është larg, nuk është e nevojshme të mbyllet ajo pjesë për kësilloj aktivitetesh”, deklaron qytetarja Nerimane Berisha.

E kryetari Përparim Rama, tha se deri në muajin shtator do të caktohet edhe buxheti për përfundimin e sheshit.

Duke shtuar se kalimi i autobusëve dhe taksive po bëhet vetëm në fazën tranzitore.

“Unë kam treguar edhe më herët që sheshi ‘Xhorxh Bush’, do të jetë vetëm për këmbësorë. Kjo është fazë tranzitore që i kemi lejuar vetëm autobusët dhe taksit. Mirëpo në momentin që i kemi procedurat gati rruga do të mbyllet edhe për taksi e edhe për autobusë. Ne tanimë jemi në dizajnim të sheshit dhe në të ardhmen, do ta heqim tërësisht asfaltin. Aty do të shtojmë gjelbërim, gurë të bukur dhe mobilieri urbane. Në muajin shtatorë do të përfundon buxhtimi për këtë shesh, e pastaj ne do ta hapim tenderin për kontratë”, theksoi Rama.

Sheshi ‘Xhorxh Bush’, udhëkryqi i “Bill Klinton” e rruga “Garibaldi” u mbyllën më 31 Maj dhe nuk do të hapet deri më 4 Qershor, thuhet në njoftimin e komunës së Prishtinës, në rrjetin social Facebook.