Arbëri

KRU “Prishtina” tregon cilat vende do të kenë reduktime të ujit të dielën për shkak të turbullirave

Kompania Rajonale e Ujësjellësit “Prishtina”, ka njoftuar se për shkak të reshjeve të dendura me vërshime që ndodhën së fundmi në vend, vazhdon të ketë turbullirë të lartë të ujit në kanalin e Ibrit.

Përmes një komunikate, KRU “Prishtina” ka bërë të ditur se në disa zona do të ketë reduktime të furnizimit me ujë deri në përmirësimin e situatës me turbullirë në kanal.

Përveç zonave ku ka pasur reduktime ditëve të fundit, edhe Drenasi do të furnizohet me ujë vetëm në orare të caktuara.

“Për qytetin e Drenasit, ju njoftojmë se kemi filluar trajtimin e ujit në orët e mesnatës me kapacitet të ulët trajtimi, duke filluar edhe furnizimin me ujë në orët e mëngjesit të sotëm. Drenasi sot furnizohet nga ora 6:00-11:00, pastaj duhet akumulim, për t'u rikthyer furnizimi me ujë në orët e darkës për Drenas. Pikat e larta në Drenas që nuk janë furnizuar me ujë nga sistemi i furnizimit, kanë autobotin (auto cisternën) si alternativë për situatën që po kalojmë”, thuhet në njoftimin e KRU “Prishtinës”.

Edhe për Fushë Kosovën bashkë me Zonën Industriale, lagjen Kalabria, Obiliqin, të cilat po furnizohen nga alternativa të tjera, do të ketë reduktime të furnizimit me ujë në oraret e njëjta sikurse ditët tjera duke vazhduar edhe të dielën nga ora 10:00 dhe do zgjasë deri në 16:00.

“Pastaj nga ora 16:00-20:00 kanë furnizim me ujë, për të vazhduar edhe ditën e nesërme me të njëjtin orar, vetëm se furnizimi për ditën e nesërme fillon në ora 05:00 në mëngjes. Për zonat e Kryeqytetit, reduktime jemi shtrënguar të aplikojmë nga ora 23:00-5:00, përveç qendra e qytetit, QKUK, QKMF-të, Dardania”, thuhet në më tej në njoftim.