1 perditesime
15:26

Pacolli: Prona ku ndodhet tarraca në shesh është e hotelit

Ish-nënkryetari i komunës së Prishtinës, Selim Pacolli, ka thënë se hoteli që është pronë e familjes Pacolli, e ka larguar vetë pjesën e vrazhdë të tarracës që ndodhet në sheshin “Nëna Terezë” në Prishtinë.

Pacolli ka thënë për KOHËN se prona ku ndodhet tarraca është në pronësi të hotelit.

“Prona ku po largohet pjesa metalike është në pronësi të hotelit. Do të largohet materiali i vrazhdë dhe atë po e bëjmë ne e jo inspektorati i Komunës së Prishtinës. Largimin e tarracave është dashur ta marrë Shpend Ahmeti sa kemi qenë në bashkëqeverisje. Edhe ne jemi si gjithë të tjerët që kanë veprimtari në qendër”, është shprehur ai.

10:20

Largohet tarraca e fundit në sheshin qendror të Prishtinës

Tarraca e fundit që ka mbetur e vendosur në sheshin qendror të Prishtinës është larguar të hënën, ka njoftuar Drejtoria e Inspektoratit në Komunën e Prishtinës.

Ky largim është bërë pas vërtetimit të vendimit të Drejtorisë së Inspektoratit dhe refuzimit të ankesës së palës nga ana e Komisionit për shqyrtimin e ankesave në këtë komunë.

“Pas vërtetimit të vendimit të Drejtorisë së Inspektoratit - Komuna e Prishtinës dhe refuzimit të ankesës së palës nga ana e Komisionit për shqyrtimin e ankesave të Komuna e Prishtinës, fillon largimin i tarracës (konstruksionit) të fundit që ishte i vendosur ne sheshin qendror të Prishtinës”, thuhet në njoftimin e komunës.

Inspektorati në Komunën e Prishtinës ka larguar të gjitha tarracat në sheshin e Prishtinës me qëllim të lirimit të hapësirës publike.