Rama: Procesi i ndërtimit të Xhamisë Qendrore më në fund u vu në binarë

Kryetari i Prishtinës, Përparim Rama, është shprehur i lumtur që procesi i ndërtimit të Xhamisë Qendrore është përmbyllur të hënën me lëshimin e lejes ndërtimore për ndërtimin e saj.

Sipas Ramës, procesi i ndërtimit të saj është shoqëruar me procedura të stërzgjatura, e që “më në fund është vënë në binarët e duhur”.

“Ky proces u shoqërua me procedura të stërzgjatura, me pajisjen e BIK-ut me kushtet ndërtimore në vitin 2017, të cilat u plotësuan me ndryshime më vonë në vitin 2020, kur edhe u pajisën me lejen për sigurimin e gropës së gërmimit. Qytetarët e lagjeve ‘Dardania’ e ‘Ulpiana’ duhet ta gëzojnë të drejtën të praktikojnë fenë e tyre në mënyrë të dinjitetshme. Andaj, jemi të lumtur që më në fund, këtë proces sot e përmbyllëm me lëshimin e lejes ndërtimore për ndërtimin e këtij objekti fetar”, ka shkruar ai në Facebook.

Komuna e Prishtinës ka lëshuar leje për ndërtimin e Xhamisë Qendrore të Prishtinës. Kështu ka konfirmuar për Kohën, zëdhënësi i Bashkësisë Islame të Kosovës, Ahmet Sadriu.

Siç bëhet e ditur vendimi është marrë sot nga Drejtoria e Urbanizmi të Komunës së Prishtinës.

“Po, është e vërtetë, sot Komuna e Prishtinës ka lëshuar vendimin për lejen finale për ndërtimin e Xhamisë Qendrore në Prishtinë”, ka thënë Sadriu.

Ndërtimin e kësaj xhamie, BIK-u e ka pasur kërkesë që pas luftës, pasi sipas tyre, në xhamitë të cilat i posedon kryeqyteti nuk ka vend për falje të besimtarëve mysliman.

Komuna e Prishtinës dhe BIK-u janë pajtuar që xhamia të ndërtohet në lagjen Dardania.

Gurëthemeli i saj është vendosur në vitin 2012, porse deri tash ka pasur vështirësi në realizimin e projektit nga BIK-u.

© KOHA. Të gjitha të drejtat janë të rezervuara.