4 perditesime
15:19

Komuna subvencionon me 100 mijë euro "Pastrimin", për të paguar borxhin

Me 30 vota pro, 14 kundër dhe 1 abstenim Komuna e Prishtinës ka ndarë 100 mijë euro për kompaninë "Pastrimi", për të paguar një pjesë të borxhit prej 680 mijë euro sa i detyrohet kompanisë për menaxhimin e deponive të Kosovës.

Nënkryetari Alban Zogaj ka kërkuar miratimin e këtij propozimi duke thënë se është e nevojshme tejkalimi i këtij ngërçi.

"Borxhi është mbi 680 mijë euro. Është borxh që është trashëguar me vite të tëra. Në emër të kryetarit të ndahen fonde nga do të ndihmohet ndërmarrja ta paguajë një pjesë të borxhit derisa aksionarët e rinj të analizojnë ngjarjen dhe të marrin masat e ardhshme", ka thënë Zogaj.

Për këtë kundër ka qenë opozita.

"VV kundër financimit të borxheve. Me menaxhmentin është problemi kryesor se ata kanë arritur të bëjnë këtë borxh. Është bërë keq menaxhim. Merreni seriozisht raportimin e aksionarëve para kuvendit", ka thënë Berat Lahu nga Vetëvendosje.

"Lëmosha të përkohshme duhet të përfundojë", ka thënë Endrit Zabergja nga Nisma.

14:18

PDK-ja në Prishtinë e akuzon asamblistin e VV-së për ikje nga drejtësia

Asamblisti i VV-së, Berat Lahu, ka sqaruar lajmin për fletarrestin, pasi asamblisti i PDK-së, Leutrim Retkoceri e ka akuzuar për ikje nga drejtësia.

"Para se të flas për pastërrtinë e qytetit të Prishtinës duhet të flas për procesin gjyqësor, si i ikur nga drejtësia. Akuzohesh për keqpërdorim që ke pas në KESCO. Kur ta sqaroni këtë atëherë flasim për pastërti të qytetit. Kur t’i dëgjojmë këto përgjigje pastaj diskutojmë për një Prishtinë më të pastër”, ka thënë ai.

Ai tha që për ketë lajm ka dëgjuar prej mediave, dhe ka qenë duke u trajtuar jashtë vendit kur ka kuptuar këtë lajm. Ai ka thënë se gjithçka që është thënë është e pa vërtetë.

Pasi kryesuesi i kuvendit, Fehmi Kupina nuk i ka lejuar të vazhdojnë me tema jashtë rendit të ditës, PDK-ja e ka lëshuar sallën e Kuvendit Komunal.

13:43

Votohet vendimi për subvencionimin e lehonave në Prishtinë

Me 47 vota pro, asnjë kundër, asnjë abstenim është aprovuar propozim-vendimi për subvencionimin e nënave lehona, përfituese të skemës sociale.

Komuna e Prishtinës ka sqaruar se në bazë të trendit të viteve të fundit, është përllogaritur se mesatarja e lindjeve të kësaj kategorie brenda një viti është 70.

Sipas Premtim Fazliut nga drejtoria për Mirëqenie Sociale, nga muaji janar deri në muajin prill kanë qenë 17 lindje të kësaj kategorie.

Asamblisti i Vetëvendosjes, Berat Lahu kërkoi që kjo shumë të ndahet për fëmijët e lindur, jo për nënat lehona. Duke theksuar se nënat që lindin binjak është mirë t'i marrin 1000 euro, pra për secilin fëmijë nga 500 euro.

11:56

Shfuqizohet pakoja emergjente për ndihmë ndaj bizneseve në Prishtinë gjatë pandemisë

Kuvendi Komunal i Prishtinës e ka shfuqizuar pakon emergjente "Prishtina 2", e cila ishte miratuar si ndihmesë për bizneset gjatë kohës së pandemisë.

Me 34 vota pro, asnjë kundër dhe asnjë abstenim është miratuar ky propozim-vendim me arsyetimin se nuk është më e nevojshme.

Sipas drejtoreshës së Financave, Valbona Makolli nga 51 milionë euro të parapara për këtë pako, 210 mijë prej tyre kanë mbetur të pashfrytëzuara.

10:55

Plani rregullues “Arbëria 3” hiqet nga rendi i ditës, banorët e “Kalabrisë” pengojnë seancën

Banorët e lagjes "Kalabria" kanë shkuar në seancën e Kuvendit Komunal që po mbahet të martën dhe po kërkojnë një takim me kryetarin e Prishtinës, Përparim Rama.

Përkundër tentimit nga ana e kryesuesit të Kuvendit Komunal, Fehmi Kupina që t'i ndalojë së foluri në seancë, ata nuk lejuan që të vazhdoj seanca pa marrë premtimin e kryetarit Rama për një takim.

Ky reagim i tyre vjen pasi pika e 10 e rendit të ditës për lënien në diskutim publik për plotësim ndryshimin e vendimit të Planit rregullues të " Arbëria 3", është hequr nga rendi i ditës së sotme.

Vendimi i Planit rregullues të lagjes Arbëria dhe i Kalabrisë është shfuqizuar në Kuvendin Komunal me rekomandim të Ministrisë së Mjedisit.

Image