Puna e zgjerimit të parkingjeve nga ndërmarrja “Prishtina Parking” është pezulluar. Kjo për shkak të formimit të një komisioni që do të bëjë rishikim të rregullores.
Kryetari Përparim Rama thotë se pezullimi përfshin edhe parkingjet në lagjen “Lakërishtë”.
“Po më vjen keq nëse dikush ka marrë kërcënime, është e patolerueshme kjo. Është formuar komisioni dhe jemi duke bërë vlerësimin e rregullores së tanishme dhe po bëjmë përmirësimin e saj, sepse nuk është e mjaftueshme apo nuk është e mirëfilltë. Është pezulluar puna, nuk është duke u zgjeruar më. Dua të shikoj punën e ‘Lakërishtës’, e di që aty është pezulluar puna. Nuk kam informata për ‘Lakërishtë’, por do të marr dhe do t’ju lajmëroj”, tha Rama.
Por punonjësit e kësaj ndërmarrjeje po vazhdojnë të shpërndajnë gjoba dhe të vendosin bllokada në lagjen “Lakërishtë”, megjithëse po hasin në kundërshtim të banorëve.
Rezidentët këtu thonë së ndërmarrja jashtëligjshëm po ua konfiskon veturat.
“Ne si banorë nuk e kishim kundërshtuar këtë në rast se do të na sigurohej një parking i sigurt. Duhet të rregullohet parkingu sipas rregullores dhe të shënohet numri i banesës ose veturës dhe në atë parking të mos parkohet asnjë parking përveç i imi. Siç e shihni, këtu mund të hyjë dhe nëse nuk është i shenjëzuar e zë parkingun tënd dhe ty të duhet të sillesh dhe të paguash vend tjetër për të gjetur parking”, tha Sami Shabanaj, banor i “Lakërshtës”.
Pas kësaj, ata thonë se u kërcënuan nga një punonjës i kësaj ndërmarrjeje.
Pasi kanë dhënë deklaratën edhe në Polici, ata për KOHËN kanë thënë se janë kërcënuar haptazi me jetë, nga një person që është prezantuar si shoferi i drejtorit të “Prishtina Parking”.
Jahë Balaj, përfaqësues i lagjes “Lakërishtë” në Prishtinë, thotë se ndihet i rrezikuar, pasi ky person me ngulmë ka kërkuar që të futej në veturën e tij.
“Një fjalë e urtë thotë kur nuk gjuajnë ujqit, që në këtë rast është shteti, gjuajnë hienat. Sot na erdhi tipi dhe tha kush është më i madhi këtu, i thashë që jam përfaqësuesi unë, e ai u prezantua si shoferi i bosit, drejtorit të ‘Prishtina Parking’ dhe tha ose keni me pranu ose keni me pësu. Madje më tha ejani deri në makinë me mua se i zgjidhim këto punë na. I thashë ne nuk kemi punë me ju, kemi punë me shtetin. Vazhdimisht insistonte më thoshte hajde me mua në makinë. Ai u paraqit si Granit Prestreshi, punëtor i ‘Prishtina Parking’, shofer i bosit, drejtorit të Prishtina Parking”, ka thënë Balaj.
Ai ka frikë se ky rast nuk do të përfundojë pa pësuar dikush nga banorët apo familjarët e tyre.
“Derisa nuk reagon shteti siç duket do të vritet dikush ose në rrugë diku, se ai na kërcënoi hapur. Unë tani jam i kërcënuar të dal rrugëve, ose fëmija dhe gruaja ime. Kjo nuk ka asnjë kuptim, janë të lajmëruar Policia, MPB, askush nuk reagon. Kur nuk funksionon shteti, bandat e kapin shtetin në dorë dhe vijnë të na kërcënojnë privatisht”, tha Balaj.
I kontaktuar nga KOHA, drejtori ekzekutiv i “Prishtina Parking”, Liridon Restelica, thotë se nuk ka shofer personal të tij, megjithatë ai konfirmon se i njëjti ka qenë në vendin e ngjarjes.
“Granit Prestreshi ka qenë sot në lagjen ‘Lakërishtë’, ku si shofer e ka ofruar një punëtor në ‘Lakërishtë’, ku janë edhe punëtorët e tjerë. Por në asnjë rast ai nuk ka folur, as nuk ka kërcënuar dikë. E pyeta edhe këtë punëtorin tjetër që ka qenë me të dhe ai më tha të njëjtën gjë. Porse ai nuk është shoferi im”, tha Restelica.
Banorët e “Lakërishtës” nuk duan që parkingu deri tash publik të jetë nën ndërmarrjen publike, e cila ua merr 10 euro në muaj për parking e nuk ua siguron këtë të fundit.
© KOHA. Të gjitha të drejtat janë të rezervuara.
