Prindërit në shkollën “Emin Duraku” të kryeqytetit mblidhen për të ndaluar hyrjen e arsimtares së historisë

Arsimtarja që “nuk e duan” në shkollën “Emin Duraku” të Prishtinës mohon se keqtrajton nxënësit

11 November 2019 10:42
14:07

Këshilli i Prindërve të shkollës “Emin Duraku”, në Prishtinë, që nga mëngjesi janë mbledhur për të ndaluar hyrjen e arsimtares Afërdita Misimi. Ata po pretendojnë se po abuzon me fëmijët dhe se ajo po i kërcënon me jetë, shkruan KosovaPress.

Drejtori i kësaj shkolle, Agron Mexhuani deklaron se nuk është hera e parë që po përballen me një gjë të tillë.

Sipas tij, stafi i shkollës janë duke u përballur me kërcënime dhe presione.

“Ne pothuajse në vazhdimësi jemi në presion të tillë, nën kërcënime të tilla, por njëkohësisht më e keqja është se nxënësit i nënshtrohen një presioni psikik brenda në shkollë”, thotë Mexhuani.

Kjo arsimtare kishte ardhur nga shkolla “Pjetër Bogdani”, para dy vjetësh dhe ishte suspenduar në fund të gushtit të vitit 2018. Por, ajo është rikthyer në shtator të këtij viti me vendim të gjykatës.

Këtë vendim drejtori Mexhuani thotë se nuk e posedon.

“Me keqardhjen më të madhe nuk e kam atë vendim, por është një çështje se fatkeqësisht gjykatat tona nuk e kanë marrë parasysh interesin e fëmijëve, interesin e shkollës apo konkretisht institucioneve edukativo-arsimore, por kanë vepruar në interesin e individit, kjo është më e keqja”, shton ai.

Mexhuani tregon se ka pasur probleme të vazhdueshme me të gjatë gjithë kohës.

“Gjithë herë ka vazhduar të kërcënoj në forma të ndryshme. Po besoj se ne si shkollë i jemi nënshtruar një presioni të një individi. Ne nuk jemi kundër Afërditës, askush nuk është kundër një arsimtari, por po besoj se secili që kemi zgjedhur një drejtim, apo profesion duhet të jemi adekuat në procesin mësimdhënës”, deklaron Mexhuani.

Arsimtarja e Historisë, Afërdita Misimi, e cila pasdite erdhi në shkollë mohon se ka përdorur dhunë ndaj fëmijëve.

Ajo tregon për KosovaPress se në këtë shkollë është kthyer me vendim të gjykatës.

“Nuk jam ajo që përdori dhunë ndaj tyre.. Kam fituar me shkallën e dytë të Inspeksionit të Punës, kam fituar në bashkëpunim me Inspeksionin e Arsimit ku i kanë gjetur dëshmitë ... tjetra kam fituar me gjykatë”, thotë Misimi.

Ajo mes tjerash thotë se asnjëherë nuk ka kërcënuar fëmijët, derisa shton se pavarësisht se Këshilli i Prindërve e kundërshton atë, do të vazhdojë të shkojë në shkollë.

“Unë jam mësimdhënëse jo e vështirë, por principiele... Po do të vazhdoj se fëmijët i kam prapa”, thotë Misimi.

KosovaPress kishte njoftuar se nxënësit për shkak të dhunës së ushtruar ndaj tyre, kishin organizuar edhe nënshkrimin e një peticioni për shkarkimin e saj, por e njëjta i kishte kërcënuar ata pasi kishte kuptuar këtë gjë.

KosovaPress ka provuar të kontaktojë me drejtoreshën për Arsim në komunën e Prishtinës Shpresa Shala por kontakti me të ka qenë i pamundur. Drejtoria për Arsim e Prishtinës nuk ka reaguar deri në orët e pasdites.

10:42

Prindërit në shkollën “Emin Duraku” të kryeqytetit mblidhen për të ndaluar hyrjen e arsimtares së historisë

​Këshilli i prindërve të shkollës “Emin Duraku”, në Prishtinë, që nga ora 07:30 janë mbledhur për të ndaluar hyrjen e arsimtares së historisë, A.M. Prindërit pretendojnë se kjo ka abuzuar me fëmijët dhe i ka kërcënuar me jetë.

Zijavere Krasniqi, kryetare e Këshillit Drejtues të kësaj shkolle tha se sot janë mbledhur në shenjë pakënaqësie ndaj DKA-së dhe gjykatave.

“Sot jemi mbledhur një pjesë e prindërve si shenjë pakënaqësie për DKA-në, faktikisht edhe për gjykatën që nuk po e merr vendimin e duhur, suspendimin e arsimtares së historisë. Ende nuk kemi marrë përgjigje prej DKA-së, po e presim të marrë një vendim të duhur edhe të shpejtë. Në të njëjtën kohë i bëj thirrje gjykatës të marrë me seriozitet shumë më të madh këtë çështje, që nuk është i lehtë”, ka thënë ajo.

Krasniqi ka thënë se nuk do të largohen nga oborri i shkollës dhe se nuk do të lejojnë hyrjen e A.M, deri sa të merret vendimi për të.

Siç thotë ajo, kjo arsimtare do të duhej të ishte në shkollë nga ora 08:00, por ajo nuk ka ardhur.

Edhe pas të premtes, kur kishte raportuar KosovaPress për këtë rast, Krasniqi tregon se ka pasur kërcënime nga ana e saj.

Image

Komentet

Shto koment

Të ngjashme